ദുബൈ: വാക്സിന് രണ്ടാം ഡോസ് സ്വീകരിച്ച് ആറുമാസം കഴിഞ്ഞവര് ബൂസ്റ്റര് ഡോസെടുക്കല് അബൂദബിയില് നിര്ബന്ധം. ഇല്ലെങ്കില് അല്ഹുസ്ന് ആപില് ‘പച്ച’ തെളിയില്ല. അടുത്ത വെള്ളിയാഴ്ച മുതല് എമിറേറ്റില് പൊതുസ്ഥലങ്ങളില് പ്രവേശിക്കാന് ഗ്രീന്പാസ് നിലവില് വരാനിരിക്കെയാണ് അബൂദബി ദുരന്തനിവാരണ സമിതി ബൂസ്റ്റര് ഡോസെടുക്കാന് നിര്ദേശിച്ചത്. രണ്ടാം ഡോസ് സ്വീകരിച്ച് ആറുമാസം പിന്നിട്ടവര്ക്ക് ബൂസ്റ്റര് സ്വീകരിക്കാന് 30 ദിവസം ഗ്രേസ് പീരിയഡായി അനുവദിക്കും. എന്നാല്, സെപ്റ്റംബര് 20നു മുമ്ബ് ബൂസ്റ്റര് വാക്സിന് സ്വീകരിച്ചില്ലെങ്കില് അല് ഹുസ്നില് സ്റ്റാറ്റസ് ‘ഗ്രേ’യാകും.വാക്സിന് പരീക്ഷണത്തിെന്റ ഭാഗമായവര്ക്ക് ഇതില് ഇളവനുവദിക്കും.
ആഗസ്റ്റ് 20 മുതല് പൊതുയിടങ്ങളില് ഗ്രീന്പാസ് നിര്ബന്ധമാണെന്ന് ജൂലൈയിലാണ് അധികൃതര് പ്രഖ്യാപിച്ചത്. ഷോപ്പിങ് സെന്ററുകള്, റസ്റ്റാറന്റുകള്, കഫേകള്, മറ്റു ചെറുകിട ഔട്ട്ലെറ്റുകള്, ജിമ്മുകള്, വിനോദ സൗകര്യങ്ങള്, കായികകേന്ദ്രങ്ങള്, ഹെല്ത്ത് ഹബുകള്, റിസോര്ട്ടുകള്, മ്യൂസിയങ്ങള്, സാംസ്കാരിക കേന്ദ്രങ്ങള്, തീം പാര്ക്കുകള് എന്നിവിടങ്ങളില് നിബന്ധന ബാധകമാണ്. ഈ പട്ടികയില് സര്വകലാശാലകള്, സ്ഥാപനങ്ങള്, പൊതു-സ്വകാര്യ സ്കൂളുകള്, നഴ്സറികള് എന്നിവയും ഉള്പ്പെടുത്തിയിട്ടുണ്ട്.
വാക്സിന് സ്വീകരിക്കുകയും പി.സി.ആര് പരിശോധനയില് നെഗറ്റിവ് ആവുകയും ചെയ്താല് 30 ദിവസം വരെ അല് ഹുസ്ന് ആപില് ഗ്രീന് പാസ് തെളിയും. കുത്തിവെപ്പെടുക്കുന്നതില് ഇളവുള്ളവര്ക്ക് പി.സി.ആര് പരിശോധന നെഗറ്റിവായി ഏഴുദിവസം വരെ ‘പച്ച’ തെളിയും. 16 വയസ്സില് താഴെയുള്ള കുട്ടികള്ക്ക് എപ്പോഴും ഗ്രീന് സ്റ്റാറ്റസ് ആയിരിക്കും. പി.സി.ആര് പരിശോധനയും ആവശ്യമില്ല. പുതിയ റെസിഡന്റ്സ് പെര്മിറ്റ് എടുത്തവര്ക്ക് വാക്സിന് സ്വീകരിക്കാന് 60 ദിവസത്തെ ഗ്രേസ് പീരിയഡ് അനുവദിക്കുമെന്നും അധികൃതര് അറിയിച്ചിട്ടുണ്ട്.