ലക്നോ: ഉത്തര്‍പ്രദേശില്‍ ബിജെപി എംഎല്‍എ നിതിന്‍ അഗര്‍വാള്‍ നടത്തിയ സത്ക്കാരത്തില്‍ ഭക്ഷണത്തിനൊപ്പം മദ്യവും വിളമ്ബിയത് വിവാദമാകുന്നു. ഹര്‍ദോയിലെ ശ്രാവണ ദേവി ക്ഷേത്രത്തില്‍ വച്ച്‌ നടന്ന പരിപാടിയിലാണ് മദ്യം വിളമ്ബിയത്. ഭക്ഷണപ്പൊതിക്കൊപ്പം ഒരോ കുപ്പി മദ്യമാണ് നല്‍കിയത്.
പരിപാടിയില്‍ പങ്കെടുത്ത സ്കൂള്‍ കുട്ടികള്‍ക്കും മദ്യക്കുപ്പിയടങ്ങിയ ഭക്ഷണപ്പൊതി വിതരണം ചെയ്തെന്നാണ് ആരോപണം. കുട്ടികള്‍ തന്നെയാണ് ഇക്കാര്യം വെളിപ്പെടുത്തിയത്. പ്ലാസ്റ്റിക് കുപ്പികളിലാക്കിയാണ് മദ്യം വിതരണം ചെയ്തത്. ഇതിന്‍റെ വീഡിയോയും പുറത്ത് വന്നതോടെ പ്രതിപക്ഷത്തുളവരുള്‍പ്പെടെ വിമര്‍ശനവും പരിഹാസവുമായി രംഗത്തെത്തി.
നിതിന്‍റെ പിതാവ് നരേഷ് അഗര്‍വാളും സത്കാരത്തില്‍ സന്നിഹിതനായിരുന്നു. ഇക്കഴിഞ്ഞ മാര്‍ച്ചിലാണ് നരേഷ് അഗര്‍വാള്‍ സമാജ്‌വാദി പാര്‍ട്ടിയില്‍ നിന്ന് ബിജെപിയിലേക്ക് മാറിയത്. സംഭവം ശ്രദ്ധയില്‍പ്പെട്ട ബിജെപി എംപി അന്‍ഷുള്‍ വര്‍മ ഇതേക്കുറിച്ച്‌ മുഖ്യമന്ത്രി യോഗി ആദിത്യ നാഥിന് പരാതി നല്‍കിയിട്ടുണ്ട്.
