വാഷിംഗ്ടണ്‍ ഡിസി: അമേരിക്കന്‍ പ്രസിഡന്‍റ് തെരഞ്ഞെടുപ്പിനുള്ള ദിവസങ്ങള്‍ അടുത്തുവരവെ ഡെമോക്രാറ്റിക് പാര്‍ട്ടിയുടെ വൈസ് പ്രസിഡന്‍റ് സ്ഥാനാര്‍ഥി ആരെന്ന് ഈ ആഴ്ച അറിയാം. വൈസ് പ്രസിഡന്‍റ് സ്ഥാനാര്‍ഥിയായി പരിഗണനയ്ക്ക വന്നവരുമായി പ്രസിഡന്‍റ് സ്ഥാനാര്‍ഥി ജോ ബൈഡന്‍ സംസാരിച്ചുവെന്നും അദ്ദേഹത്തിന്‍റെ ക്യാംപ് ഒരു തീരുമാനത്തിലെത്തിയെന്നുമാണ് വിവരം.
ന്യൂയോര്‍ക്ക് ടൈംസാണ് ഇത് സംബന്ധിച്ച വിവരം റിപ്പോര്‍ട്ട് ചെയ്തത്. കാലിഫോര്‍ണിയ സെനറ്റര്‍ കമലാ ഹാരിസിലോ, ബരാക് ഒബാമയുടെ കാലത്തെ ദേശീയ സുരക്ഷാ ഉപദേഷ്ടാവ് സൂസന്‍ റൈസിലോ ആയിരിക്കും ഈ ദൗത്യം ചെന്നെത്തുകയെന്നും വാര്‍ത്തകളുണ്ട്. എന്നാല്‍ ഇതിനോട് ബൈഡനോ, അദ്ദേഹത്തിന്‍റെ അനുയായികളോ ഒൗദ്യോഗികമായി പ്രതികരിച്ചിട്ടില്ല.
മസാച്യുസെറ്റ്സ് സെനറ്റര്‍ എലിസബത്ത് വാറന്‍, മിഷിഗണ്‍ ഗവര്‍ണര്‍ ഗ്രചെന്‍ വൈറ്റ്മെര്‍ തുടങ്ങിയവരുടെ പേരുകളും പറഞ്ഞുകേള്‍ക്കുന്നുണ്ട്. ഇതിനു പുറമേ മറ്റ് അഞ്ചോളം പേരുടെ പേരുകളും ഉയര്‍ന്നുവന്നെന്നാണ് പാര്‍ട്ടിവൃത്തങ്ങളെ ഉദ്ധരിച്ച്‌ ന്യൂയോര്‍ക്ക് ടൈംസ് അടക്കമുള്ള മാധ്യമങ്ങള്‍ റിപ്പോര്‍ട്ട് ചെയ്തത്.
