അയര്‍ലന്‍ഡിനെതിരായി വരാനിരിക്കുന്ന ടി20 പരമ്പരയില്‍ ഇന്ത്യയ്ക്ക് പുതിയ നായകന്‍. ഐപിഎല്‍ 15ാം സീസണില്‍ ഗുജറാത്ത് ടൈറ്റന്‍സിനെ ഫൈനലിലെത്തിച്ച ഹാര്‍ദ്ദിക് പാണ്ഡ്യ അയര്‍ലന്‍ഡിനെതിരെ ഇന്ത്യന്‍ ടീമിനെ നയിക്കുമെന്നാണ് റിപ്പോര്‍ട്ടുകള്‍. പരിക്ക് കാരണം ഏറെ നാളായി ടീമിന് പുറത്തായിരുന്ന ഹാര്‍ദ്ദിക് ദക്ഷിണാഫ്രിക്കക്കെതിരായ ടി20 പരമ്പരയിലൂടെയാണ് ടീമിലേക്ക് തിരികെ എത്തുന്നത്.
ജൂണ്‍ അവസാനമാണ് ഇന്ത്യ അയര്‍ലന്‍ഡിനെതിരെ രണ്ട് ടി20 മത്സരങ്ങള്‍ കളിക്കുന്നത്. രണ്ടാം നിര സ്‌ക്വാഡിനെ ഈ പരമ്പരയ്ക്ക് അയക്കാനാണ് ബിസിസിഐ പദ്ധതിയിടുന്നത്. സീനിയര്‍ ടീം ഇംഗ്ലണ്ടിനെതിരെ ടെസ്റ്റ് പരമ്പരയിലായിരിക്കും എന്നതിനാലാണിത്.
ഇംഗ്ലണ്ടിനെതിരായ ബിര്‍മിങ്ഹാം ടെസ്റ്റിന് മുന്‍പായുള്ള ഇന്ത്യയുടെ സന്നാഹ മത്സരത്തിന്റെ സമയമാണ് അയര്‍ലന്‍ഡ് പര്യടനം. രോഹിത്, രാഹുല്‍, പന്ത് എന്നീ താരങ്ങള്‍ സന്നാഹ മത്സരം കളിക്കും. അതിനാല്‍ ടി20 ടീമിന്റെ ഭാഗമാവാനാവില്ല.
ഭുവനേശ്വര്‍ കുമാര്‍, ഹര്‍ദിക് പാണ്ഡ്യ എന്നിവരെയാണ് ക്യാപ്റ്റന്‍ സ്ഥാനത്തേക്ക് സെലക്ടര്‍മാര്‍ പരിഗണിക്കുന്നത്. നേരത്തെ ട്വന്റി20 ക്യാപ്റ്റന്‍ സ്ഥാനത്തേക്ക് പരിഗണിച്ചിരുന്നത് ധവാനെ ആയിരുന്നു. എന്നാല്‍ ടീമിലെ സ്ഥാനം തന്നെ ധവാന് നഷ്ടമായി കഴിഞ്ഞു.
മലയാളി താരം സഞ്ജു സാംസണും ഈ പരമ്പരയില്‍ അവസരം ലഭിച്ചേക്കും. കൂടാതെ ഐപിഎല്ലില്‍ മികവ് കാട്ടിയ ഒരുപിടി യുവതാരങ്ങള്‍ക്കും അയര്‍ലാന്‍ഡിലേക്ക് ടിക്കറ്റ് ലഭിക്കും.
