ബെയ്റൂട്ട്: ബെയ്റൂട്ടില്‍ കഴിഞ്ഞ മാസമുണ്ടായ സ്ഫോടനത്തില്‍ കൊല്ലപ്പെട്ടയാള്‍ക്ക് ആദരമര്‍പ്പിച്ച്‌ ഉതിര്‍ത്ത വെടിയുണ്ട തലയില്‍ കൊണ്ട് പരുക്കേറ്റ ലെബനാന്‍ ഫുട്ബോള്‍ താരം മരിച്ചു. മൂന്ന് തവണ ലെബനന്‍ ടീമിന്‍റെ നായകനായിരുന്ന മുഹമ്മദ് അത്വി (32) ആണ് മരിച്ചത്.
ഓഗസ്റ്റ് 21നാണ് അത്വിക്ക് പരുക്കേറ്റത്. സ്ഫോടനത്തില്‍ കൊല്ലപ്പെട്ട അഗ്നിശമന സേനാ ഉദ്യോഗസ്ഥന്‍റെ മൃതദേഹ സംസ്ക്കാര ചടങ്ങിനിടെ ആദരസൂചകമായി ആകാശത്തേക്ക് വെടിയുതിര്‍ത്തപ്പോള്‍ ഒരു ബുള്ളറ്റ് തെരുവിലൂടെ നടക്കുകയായിരുന്ന അത്വിയുടെ തലയില്‍ കൊള്ളുകയായിരുന്നു. തുടര്‍ന്ന് അത്യാഹിത വിഭാഗത്തില്‍ ചികിത്സയിലായിരുന്നു ഇദ്ദേഹം. സംഭവവുമായി ബന്ധപ്പെട്ട് ആരെയും അറസ്റ്റ് ചെയ്തിട്ടില്ല.
