ഇന്ത്യ-ന്യൂസിലാന്റ് ടി20 പരമ്പരയിലെ മൂന്നാമത്തെയും അവസാനത്തെയും മത്സരം ഇന്ന് നടക്കും. വൈകിട്ട് ഏഴുമുതല്‍ കൊല്‍ക്കത്തയിലെ ഈഡന്‍ ഗാര്‍ഡനിലാണ് മത്സരം. ആദ്യ രണ്ട് മത്സരങ്ങള്‍ നേടിയ ഇന്ത്യ ഇതിനോടകം പരമ്പര സ്വന്തമാക്കി കഴിഞ്ഞു. പരമ്പര തൂത്തുവാരാന്‍ ഇന്ത്യ ഇറങ്ങുമ്പോള്‍ വൈറ്റ് വാഷ് ഒഴിവാക്കാനുള്ള തന്ത്രപ്പാടിലാണ് കിവീസ്.
ഇന്ത്യക്ക് വലിയ ബാറ്റിംഗ് റെക്കോഡ് അവകാശപ്പെടാന്‍ സാധിക്കുന്ന പിച്ചാണ് ഈഡന്‍ ഗാര്‍ഡനിലേത്. പൊതുവേ ബാറ്റിംഗിന് അനുകൂലമായ പിച്ചാണിത്. അതിനാല്‍ രണ്ട് ടീമിന്റെയും വലിയ ബാറ്റിംഗ് പ്രകടനങ്ങള്‍ ഇന്ന് കാണാം. ഏകദിനത്തിലെ ഉയര്‍ന്ന വ്യക്തിഗത സ്‌കോര്‍ രോഹിത് അടിച്ചെടുത്തത് ഈ മൈതാനത്താണ്.
മൂന്നാം മത്സരത്തില്‍ ഇന്ത്യ ടീമില്‍ അധികം മാറ്റം വരുത്തില്ലെന്നാണ് നായകന്‍ രോഹിത് ശര്‍മ കഴിഞ്ഞ ദിവസം പറഞ്ഞത്. അതിനാല്‍ കഴിഞ്ഞ മത്സരത്തിലെ ടീമിനെ തന്നെ ഇന്ത്യ നിര്‍ത്തിയേക്കും. എന്നിരുന്നാലും ചിലപ്പോള്‍ അക്ഷര്‍ പട്ടേലിന് പകരം യുസ്‌വേന്ദ്ര ചഹലിന് അവസരം നല്‍കാന്‍ സാധ്യതയുണ്ട്.
ഇന്ത്യ സാധ്യതാ ഇലവന്‍: കെ എല്‍ രാഹുല്‍, രോഹിത് ശര്‍മ, സൂര്യകുമാര്‍ യാദവ്, ശ്രേയസ് അയ്യര്‍, റിഷഭ് പന്ത്, വെങ്കടേഷ് അയ്യര്‍, അക്ഷര്‍ പട്ടേല്‍/യുസ്‌വേന്ദ്ര ചഹല്‍, ആര്‍ അശ്വിന്‍, ഭുവനേശ്വര്‍ കുമാര്‍, ദീപക് ചഹാര്‍, ഹര്‍ഷല്‍ പട്ടേല്‍.
