കുട്ടിക്രിക്കറ്റിന്റെ ലോകമാമാങ്കത്തില്‍ സൂപ്പര്‍ പോരാട്ടങ്ങള്‍ക്ക് ശനിയാഴ്ച തുടക്കം.നേരത്തേ തുടങ്ങിയ പ്രാഥമിക റൗണ്ട് മത്സരങ്ങള്‍ക്ക് വെള്ളിയാഴ്ച അവസാനമാകും. അതിനുപിറകെയാണ് 12 ടീമുകള്‍ രണ്ടു റൗണ്ടുകളിലായി അങ്കംവെട്ടുന്ന സൂപ്പര്‍ 12 പോരാട്ടങ്ങള്‍ക്ക് മൈതാനമുണരുക.
ഗ്രൂപ് ഒന്നിലേക്ക് ആസ്ട്രേലിയ, ഇംഗ്ലണ്ട്, ന്യൂസിലന്‍ഡ്, അഫ്ഗാനിസ്താന്‍ ടീമുകളാണ് നേരിട്ട് യോഗ്യത നേടിയത്. രണ്ടാം ഗ്രൂപ്പില്‍ ഇന്ത്യ, പാകിസ്താന്‍, ദക്ഷിണാഫ്രിക്ക, ബംഗ്ലാദേശ് ടീമുകളും. പ്രാഥമിക റൗണ്ടിലെ രണ്ടു ഗ്രൂപ്പുകളിലെയും ആദ്യ രണ്ടു സ്ഥാനക്കാര്‍ ഇവര്‍ക്കൊപ്പം ചേരും. ഗ്രൂപ് എ മത്സരങ്ങള്‍ പൂര്‍ത്തിയായപ്പോള്‍ ശ്രീലങ്കയും നെതര്‍ലന്‍ഡ്സും സൂപ്പര്‍ 12ലേക്ക് യോഗ്യത നേടിയിട്ടുണ്ട്. ബി ഗ്രൂപ്പിലെ അവസാന മത്സരങ്ങള്‍ വെള്ളിയാഴ്ചയാണ്. വെസ്റ്റിന്‍ഡീസ്, സിംബാബ്‍വെ, സ്കോട്ട്‍ലന്‍ഡ്, അയര്‍ലന്‍ഡ് ടീമുകള്‍ക്കെല്ലാം രണ്ടു പോയന്റ് വീതമായതിനാല്‍ ജയിക്കുന്ന ടീമുകള്‍ മുന്നേറും. അയര്‍ലന്‍ഡും വെസ്റ്റിന്‍ഡീസും തമ്മിലും സ്കോട്ട്‍ലന്‍ഡും സിംബാബ്‍വെയും തമ്മിലുമാണ് മത്സരം.
ശനിയാഴ്ച ആതിഥേയരായ ആസ്ട്രേലിയ അയല്‍ക്കാരായ ന്യൂസിലന്‍ഡിനെ നേരിടുന്നതോടെയാണ് സൂപ്പര്‍ 12 റൗണ്ടിന് തുടക്കമാവുക. രണ്ടാം മത്സരത്തില്‍ ഇംഗ്ലണ്ട് അഫ്ഗാനിസ്താനുമായും ഏറ്റുമുട്ടും. ഞായറാഴ്ച പാകിസ്താനെതിരെയാണ് ഇന്ത്യയുടെ ആദ്യകളി.
ആറു ടീമുകള്‍ വീതമുള്ള ഇരുഗ്രൂപ്പുകളിലെയും ആദ്യ രണ്ടു സ്ഥാനക്കാര്‍ സെമി ഫൈനലിലേക്ക് മുന്നേറും. നവംബര്‍ 9,10 തീയതികളിലാണ് സെമി. ഫൈനല്‍ 13ന് നടക്കും.
