കുവൈറ്റ് സിറ്റി: ഇന്ത്യന്‍ വിദേശകാര്യ മന്ത്രി എസ്. ജയശങ്കറിന്റെ മൂന്നു ദിവസത്തെ കുവൈറ്റ് സന്ദര്‍ശനം ഇന്നാരംഭിക്കും. അമീര്‍ ഷെയ്ഖ് നവാഫ് അല്‍-അഹമ്മദ് അല്‍-സബായ്ക്കുള്ള പ്രധാനമന്ത്രി നരേന്ദ്ര മോദിയുടെ വ്യക്തിഗത കത്തുമായാണ് വിദേശകാര്യ മന്ത്രി എത്തുന്നത്. ഇരു രാജ്യങ്ങളും തമ്മിലുള്ള ഉഭയകക്ഷി ബന്ധങ്ങള്‍ ശക്തിപ്പെടുത്തുന്നതിനുള്ള ചര്‍ച്ചകള്‍ സന്ദര്‍ശനത്തിന്റെ ഭാഗമാണ്.
വിദേശ മന്ത്രിയെന്ന നിലയില്‍ ജയശങ്കറിന്റെ ആദ്യ കുവൈറ്റ് സന്ദര്‍ശനമാണിത്.കുവൈറ്റിലെ ഇന്ത്യന്‍ സമൂഹത്തെ ജയശങ്കര്‍ അഭിസംബോധന ചെയ്യും. ഊര്‍ജം, വ്യാപാരം, മുതല്‍മുടക്ക്, മനുഷ്യ വിഭവശേഷി, തൊഴില്‍, വിവര സാങ്കേതിക വിദ്യ തുടങ്ങിയ മേഖലകളില്‍ സഹകരണം ശക്തിപ്പെടുത്താനുള്ള ചട്ടക്കൂടു തയാറാക്കാന്‍ സംയുക്ത മന്ത്രിതല കമ്മിഷനെ നിയോഗിക്കാന്‍ മൂന്നു മാസം മുന്‍പ് ഇരു രാജ്യങ്ങളും തീരുമാനിച്ചിരുന്നു. കുവൈറ്റ് വിദേശകാര്യ മന്ത്രി ഷെയ്ഖ് അഹമ്മദ് നാസര്‍ അല്‍- മുഹമ്മദ് അല്‍-സബാ മാര്‍ച്ചില്‍ ഇന്ത്യ സന്ദര്‍ശിച്ചപ്പോഴാണിത്.
ഇന്ത്യയും കുവൈറ്റും തമ്മില്‍ നയതന്ത്ര ബന്ധങ്ങള്‍ സ്ഥാപിച്ചതിന്റെ അറുപതാം വര്‍ഷമാണ് 2021-22. പത്തുലക്ഷത്തോളം ഇന്ത്യക്കാര്‍ കുവൈറ്റിലുണ്ട്. അവരുടെ വലിയ വ്യാപാര പങ്കാളിയും ഇന്ത്യയാണ്. ഇന്ത്യയ്ക്ക് എണ്ണ നല്‍കുന്ന പ്രമുഖ ഗള്‍ഫ് രാജ്യം. കൊവിഡ് രണ്ടാം തരംഗത്തെ നേരിടുന്നതില്‍ ഇന്ത്യയ്ക്കു സഹായം നല്‍കാന്‍ കുവൈറ്റ് മുന്‍പന്തിയിലുണ്ടായിരുന്നു.
