ന്യൂഡല്‍ഹി: രാജ്യത്ത് കോവിഡ് വ്യാപനം അതിരൂക്ഷം. വ്യാഴാഴ്ച രാജ്യത്താകെ 81,466 പുതിയ കേസുകള്‍ റിപ്പോര്‍ട്ട് ചെയ്തു. ഇതോടെ ആകെ കോവിഡ് ബാധിച്ചവരുടെ എണ്ണം 1.23 കോടിയായി. ഇന്നലെ മാത്രം 469 പുതിയ മരണങ്ങളും റിപ്പോര്‍ട്ട് ചെയ്തു.
ഡിസംബര്‍ ആറിനു ശേഷം ഇത്രയും അധികം മരണങ്ങള്‍ റിപ്പോര്‍ട്ട് ചെയ്യുന്നത് ആദ്യമാണ്. ഒക്ടോബര്‍ രണ്ടിനു ശേഷമുള്ള ഏറ്റവും കൂടുതല്‍ പ്രതിദിന കേസുകളാണ് വ്യാഴാഴ്ച റിപ്പോര്‍ട്ട് ചെയ്തത്. മഹാരാഷ്ട്ര, ഛത്തീസ്ഗഡ്, കര്‍ണാടക, പഞ്ചാബ്, കേരളം, തമിഴ്‌നാട്, ഗുജറാത്ത്, മധ്യപ്രദേശ് എന്നിവിടങ്ങളില്‍ ദിനംപ്രതി പുതിയ കേസുകള്‍ കുത്തനെ വര്‍ധിച്ചുകൊണ്ടിരിക്കുകയാണ്. മഹാരാഷ്ട്രയില്‍ കോവിഡ് അതിവേഗം വര്‍ധിച്ചുവരികയാണ്. ഇവിടെ സുരക്ഷാ മാര്‍ഗനിര്‍ദേശങ്ങള്‍ സര്‍ക്കാര്‍ ശക്തമാക്കിയിട്ടുണ്ട്. ആര്‍ടി-പിസിആര്‍ പരിശോധനകളുടെ നിരക്ക് 1,000 രൂപയില്‍ നിന്നും 500 രൂപയായി സര്‍ക്കാര്‍ കുറച്ചിട്ടുണ്ട്. ദ്രുത ആന്‍റിജന്‍ പരിശോധനയ്ക്കുള്ള നിരക്കുകളും കുറച്ചു.
