ബംഗളുരു: കന്നഡ സിനിമാലോകത്തെ പിടിച്ചുലച്ച മയക്കുമരുന്ന് ഇടപാടുമായി ബന്ധപ്പെട്ട കേസില് പ്രമുഖതാരം രാഗിണി ദ്വിവേദി അറസ്റ്റില്. എട്ടു മണിക്കൂര് നീണ്ട ചോദ്യം ചെയ്യലിന് ഒടുവിലാണ് നടിയെ അറസ്റ്റ് ചെയ്യുന്നത്. വെള്ളിയാഴ്ച രാവിലെ മുതല് രാഗിണിയുടെ യെലഹങ്കയിലെ വീട്ടില് സിസിബി ഉദ്യോഗസ്ഥര് റെയ്ഡ് നടത്തിയിരുന്നു. വൈകുന്നേരത്തോടെയാണ് അറസ്റ്റ് രേഖപ്പെടുത്തിയത്.
നടിയെ ചോദ്യംചെയ്യാന് സെന്ട്രല് ക്രൈംബ്രാഞ്ച് സംഘം നോട്ടീസ് നല്കിയിരുന്നെങ്കിലും വ്യക്തിപരമായ അസൗകര്യങ്ങളുള്ളതിനാല് തിങ്കളാഴ്ച നേരിട്ട് ഹാജരാകാമെന്ന് നടി അന്വേഷണസംഘത്തെ അറിയിച്ചു. അന്വേഷണ ഉദ്യോഗസ്ഥര് ആവശ്യപ്പെട്ടാല് ഹാജരാകുക എന്നതു പൗരനെന്ന നിലയിലുള്ള കടമയാണെന്നും ഒന്നും ഒളിച്ചുവയ്ക്കാനില്ലെന്നും നടി വിശദീകരിച്ചു. പിന്നാലെയാണ് റെയ്ഡ് ആരംഭിച്ചത്.
ചലച്ചിത്രതാരങ്ങള്ക്കു മയക്കുമരുന്ന് എത്തിച്ചുനല്കിയ മൂന്നുപേരെ കഴിഞ്ഞദിവസം സെന്ട്രല് നാര്ക്കോട്ടിക് കണ്ട്രോള് ബ്യൂറോ അറസ്റ്റ്ചെയ്തതോടെയാണ് കന്നഡ സിനിമയിലെ പ്രമുഖര്ക്കുനേരെ ആരോപണം ഉയരുന്നത്. രാഗിണിയുടെ സുഹൃത്തും ആര്ടിഒ ഓഫീസിലെ ഉദ്യോഗസ്ഥനുമായ രവിശങ്കറിനെ മയക്കുമരുന്ന് കേസില് അറസ്റ്റ് ചെയ്തിരുന്നു. നടി സഞ്ജന ഗല്റാണിയോടും ചോദ്യം ചെയ്യലിന് ഹാജാരാകാന് ക്രൈംബ്രാഞ്ച് ആവശ്യപ്പെട്ടിട്ടുണ്ട്.
വിഷയത്തില് ചലച്ചിത്രകാരനും മാധ്യമപ്രവര്ത്തകനുമായ ഇന്ദ്രജിത് ലങ്കേഷ് നേരത്തെ അന്വേഷണസംഘത്തിനു മൊഴി നല്കിയിരുന്നു. കുറഞ്ഞത് 15 താരങ്ങള്ക്കെങ്കിലും മയക്കുമരുന്നു സംഘങ്ങളുമായി ബന്ധമുണ്ടെന്നായിരുന്നു അദ്ദേഹത്തിന്റെ മൊഴി.