സിനിമയിലേക്കുള്ള ക്ഷണം നിരസിച്ചതിന്റെ പേരില് അധ്യാപിക സായി ശ്വേതയെ സമൂഹമാധ്യമത്തിലൂടെ അപമാനിച്ച അഭിഭാഷകന് ശ്രീ ജിത്ത് പെരുമനയ്ക്കെതിരെ വനിതാ കമ്മീഷന് കേസെടുത്തു. ഇത് സംബന്ധിച്ച് കോഴിക്കോട് റൂറല് എസ്പിയോട് വനിതാ കമ്മീഷന് റിപ്പോര്ട്ട് തേടി. ശ്രീ ജിത്തിനെതിരെ സായി ശ്വേത കഴിഞ്ഞ ദിവസം പരാതി നല്കിയിരുന്നു.
സര്ക്കാരിന്റെ വിക്ടേഴ്സ് ചാനല് വഴി മിട്ടു പൂച്ചയേയും തങ്കു പൂച്ചയേയും ഓണ്ലൈന് ക്ലാസുകളിലൂടെ വ്യത്യസ്തമായി അവതരിപ്പിച്ച് ശ്രദ്ധ നേടിയ അ ധ്യാപികയാണ് സായി ശ്വേത. സമൂഹമാധ്യമത്തിലൂടെ ഒരു അഭിഭാഷകന് അപകീര്ത്തിപ്പെടുത്തുന്നുവെന്നാരോപിച്ചാണ് സായി രംഗത്തെത്തിയത്. സിനിമയില് അഭിനയിപ്പിക്കാമെന്ന പേരിലാണ് അഭിഭാഷകന് വിളിച്ചത്.
എന്നാല് താത്പര്യമില്ലെന്നറിയിച്ചതിന് പിന്നാലെ അഭിഭാഷകന് ഫേസ്ബുക്കില് മോശമായ രീതിയില് പോസ്റ്റിട്ട് അപമാനിച്ചുവെന്നാണ് പറയുന്നത്. ഒരു സ്ത്രീക്കും ഇത്തരം അനുഭവം ഉണ്ടാവാന് പാടില്ലെന്നും സംഭവത്തില് നിയമനടപടി സ്വീകരിച്ചതായും സായി ശ്വേത പറഞ്ഞു. ഇതു സംബന്ധിച്ച് ഡിജിപിക്കാണ് പരാതി നല്കിയത്. ഫേസ്ബുക്ക് പോസ്റ്റിലൂടെ തനിക്കുണ്ടായ അനുഭവം സായിശ്വേത വിശദമാക്കുകയും ചെയ്തു.