കോവിഡ് 19ന് തുടര്‍ന്ന് ഏര്‍പ്പെടുത്തിയ വിസ നിയന്ത്രണങ്ങളില്‍ ഭാഗിക ഇളവുമായി കേന്ദ്രസര്‍ക്കാര്‍. ഒ.സി.ഐ(ഓവര്‍സീസ് സിറ്റിസണ്‍ ഓഫ് ഇന്ത്യ) പി.ഐ.ഒ(പേഴ്സണ്‍ ഓഫ് ഇന്ത്യന്‍ ഒറിജിന്‍) എന്നിവര്‍ക്ക് ഇന്ത്യയിലേക്ക് ഇനി യാത്ര നടത്താം. ടൂറിസ് വിസ ഒഴികെ വിദേശികള്‍ക്കുള്ള മറ്റ് വിസകളും പുനഃസ്ഥാപിച്ചു. വന്ദേഭാരത് മിഷെന്‍റ ഭാഗമായി എത്തുന്ന വിമാനങ്ങള്‍ക്കും വ്യോമയാന മന്ത്രാലയം അനുമതി നല്‍കുന്ന പ്രത്യേക സര്‍വീസുകള്‍ക്കും ഇളവ് ബാധകമാണ്.
ഇളവുകളുടെ ഭാഗമായി ഇന്ത്യയിലെത്തുന്നവര്‍ ആരോഗ്യവകുപ്പിെന്‍റ നിര്‍ദേശങ്ങള്‍ കര്‍ശനമായി പാലിക്കണമെന്നും കേന്ദ്രസര്‍ക്കാര്‍ നിര്‍ദേശിച്ചിട്ടുണ്ട്. അതേസമയം, ഇലക്ട്രോണിക് വിസ, ടൂറിസ്റ്റ് വിസ, മെഡിക്കല്‍ വിസ എന്നിവയൊന്നും പുനഃസ്ഥാപിച്ചിട്ടില്ല. ഇത്തരം വിസകളുടെ കാലാവധി പൂര്‍ത്തിയായ ആരെങ്കിലും ഇന്ത്യയിലുണ്ടെങ്കില്‍ അത് നീട്ടി ലഭിക്കുവാനായി ബന്ധപ്പെട്ട ഏജന്‍സിയെ സമീപിക്കാമെന്നും കേന്ദ്രസര്‍ക്കാര്‍ വ്യക്തമാക്കിയിട്ടുണ്ട്.
മാര്‍ച്ച്‌ 25ന് ലോക്ഡൗണ്‍ പ്രഖ്യാപിച്ചതോടെയാണ് രാജ്യത്തേക്ക് വിദേശത്ത് നിന്നും എത്തുന്നവരെ സര്‍ക്കാര്‍ നിയന്ത്രിച്ചത്. ലോക്ഡൗണ്‍ പ്രഖ്യാപനത്തിന് പിന്നാലെ വിവിധതരം വിസകള്‍ക്ക് സര്‍ക്കാര്‍ നിയന്ത്രണം ഏര്‍പ്പെടുത്തിയിരുന്നു. ലോക്ഡൗണിനെ തുടര്‍ന്ന് നിര്‍ത്തിവെച്ച അന്താരാഷ്ട്ര വിമാന സര്‍വീസുകള്‍ ഇനിയും പുനഃരാരംഭിച്ചിട്ടില്ല.
