പി വി അന്വര് ഇനി അടഞ്ഞ അധ്യായമെന്ന് യുഡിഎഫ് കണ്വീനര് അടൂര് പ്രകാശ് . സാമാന്യ മര്യാദ ലംഘിച്ചുള്ള വാക്കുകളാണ് അന്വറിന്റെ വാര്ത്താ സമ്മേളനത്തില് കേട്ടതെന്നും യുഡിഎഫുമായി സഹകരിച്ചു പോകാന് തയ്യാറല്ല എന്നതിന്റെ സൂചനയാണ് വ്യക്തമാകുന്നതെന്നും അടൂര്വ പ്രകാശ് പറഞ്ഞു .
സാമാന്യ മര്യാദകളെല്ലാം ലംഘിച്ചുകൊണ്ടുള്ള പ്രവര്ത്തനങ്ങളുമായാണ് അന്വര് മുന്നോട്ടു പോകുന്നതെന്ന യാഥാര്ത്ഥ്യം ഉള്ക്കൊള്ളുന്നു. യുഡിഎഫില് സഹകരിപ്പിക്കാമെന്ന് അന്വറിനോട് മുന്നണി കണ്വീനര് എന്ന നിലയില് താന് തന്നെയാണ് പറഞ്ഞത്. യുഡിഎഫിലെ മുതിര്ന്ന നേതാക്കളുമായുള്ള ചര്ച്ചയുടെ അടിസ്ഥാനത്തില് ഉരുത്തിരിഞ്ഞ അഭിപ്രായം എന്ന നിലയിലാണ്, യുഡിഎഫ് തീരുമാനം ടെലഫോണിലൂടെ അദ്ദേഹത്തെ അറിയിച്ചത്. സഹകരിക്കണമെന്ന് അദ്ദേഹത്തോട് ആവശ്യപ്പെടുകയും ചെയ്തിരുന്നു.
നിലവില് അന്വര് യുഡിഎഫിനെ സംബന്ധിച്ചിടത്തോളം അടഞ്ഞ അധ്യായമായി മാറിക്കഴിഞ്ഞു. പി കെ കുഞ്ഞാലിക്കുട്ടി അടക്കമുള്ള നേതാക്കളുമായി ആലോചിച്ചാണ് ആ അധ്യായം അടച്ചത്. മുസ്ലിം ലീഗിന് അസംതൃപ്തിയുണ്ടെന്ന് വ്യാജ പ്രചാരണമാണ്. ലീഗ് യുഡിഎഫിനൊപ്പമാണ്. ഞങ്ങള് അന്വറിന്റെ പിന്നാലെ പോകുന്ന പ്രശ്നമില്ലെന്നും അടൂര് പ്രകാശ് പറഞ്ഞു.
