തിരുവനന്തപുരം: കസ്തൂരി രംഗന്‍ റിപ്പോര്‍ട്ടിന്മേല്‍ കേരളത്തിന്റെ ശുപാര്‍ശകള്‍ അംഗീകരിച്ചുകൊണ്ടുള്ള കരട് വിജ്ഞാപനം പുറത്തിറങ്ങുമെന്നതില്‍ സംശയമില്ലെന്ന് മുഖ്യമന്ത്രി ഉമ്മന്‍ചാണ്ടി മാധ്യമ പ്രവര്‍ത്തകരോട് പറഞ്ഞു. കരട് വിജ്ഞാപനം ഇന്നുതന്നെ പുറത്തിറങ്ങുമെന്ന് കേന്ദ്ര വനം പരിസ്ഥിതിമന്ത്രി വീരപ്പമൊയ്‌ലി ഉറപ്പ് നല്‍കിയതായി രമേശ് ചെന്നിത്തല പറഞ്ഞു.ഈ വിഷയത്തില്‍ സോണിയാഗാന്ധിയില്‍നിന്ന് ഉറപ്പ് ലഭിച്ചിട്ടുണ്ടെന്ന് കേന്ദ്രമന്ത്രി കെ വി തോമസും മാധ്യമങ്ങളോട് പറഞ്ഞു. ആവശ്യമെങ്കില്‍ തിരഞ്ഞെടുപ്പ് കമ്മീഷന്റെ അനുമതി തേടുമെന്നും അദ്ദേഹം അറിയിച്ചു. കരട് വിജ്ഞാപനം വൈകുമെന്ന ആശങ്ക ഉയര്‍ന്ന സാഹചര്യത്തിലാണ് നേതാക്കള്‍ ഇക്കാര്യം അറിയിച്ചത്.
തിരഞ്ഞെടുപ്പ് പ്രഖ്യാപിച്ച സാഹചര്യത്തില്‍ വിജ്ഞാപനം പുറപ്പെടുവിക്കുന്നതിന് തിരഞ്ഞെടുപ്പ് കമ്മീഷന്റെ അനുമതി തേടേണ്ടതുണ്ടോ എന്നകാര്യം പരിശോധിക്കുമെന്ന് കേന്ദ്ര വനം പരിസ്ഥിതി മന്ത്രാലയ വൃത്തങ്ങള്‍ മാധ്യമങ്ങളോട് പറഞ്ഞിരുന്നു. ഇതോടെയാണ് കരട് വിജ്ഞാപനം വൈകുമെന്ന ആശങ്ക ഉയര്‍ന്നത്.
