റഷ്യയോട് കൂട്ടിച്ചേര്ത്ത യുക്രെയ്ന് പ്രദേശങ്ങള് ഓരോ ഇഞ്ചും തിരിച്ചുപിടിക്കാനുള്ള പോരാട്ടത്തില് യു.എസും നാറ്റോയും ഒപ്പമുണ്ടാകുമെന്ന് പ്രസിഡന്റ് ജോ ബൈഡന്.
യുക്രെയ്ന്റെ 15 ശതമാനത്തോളം വരുന്ന മേഖലകള് റഷ്യ രാജ്യത്തോട് കൂട്ടിച്ചേര്ത്തത് മേഖലയെ കൂടുതല് സംഘര്ഷഭരിതമാക്കിയ പശ്ചാത്തലത്തിലാണ് യു.എസ് പ്രസിഡന്റിന്റെ പ്രസ്താവന. റഷ്യയുടെ നടപടിക്ക് പിന്നാലെ നാറ്റോ സൈനിക സഖ്യത്തില് ചേരാനുള്ള നടപടികള് യുക്രെയ്ന് പ്രസിഡന്റ് വ്ലോദിമിര് സെലന്സ്കി വേഗത്തിലാക്കി.
‘അമേരിക്കയെയും സഖ്യകക്ഷികളെയും പുടിന് തന്റെ ചിന്തയില്ലാത്ത വാക്കുകളും ഭീഷണിയും കൊണ്ട് ഭയപ്പെടുത്താന് നോക്കേണ്ട. അയല്രാജ്യത്തിന്റെ ഭൂപ്രദേശം കൈക്കലാക്കി ഒഴിഞ്ഞുമാറിക്കഴിയാമെന്നും കരുതേണ്ട’ -ബൈഡന് പറഞ്ഞു.
‘അമേരിക്കയും നാറ്റോ സഖ്യകക്ഷികളും പൂര്ണമായും തയാറെടുത്തു കഴിഞ്ഞു. ഓരോ ഇഞ്ച് ഭൂപ്രദേശവും സംരക്ഷിക്കും. ഞാന് പറയുന്നതിനെ പുടിന് തെറ്റിദ്ധരിക്കരുത്, ഓരോ ഇഞ്ചും എന്ന് തന്നെയാണ് പറയുന്നത്’ -ബൈഡന് മാധ്യമപ്രവര്ത്തകരുടെ മുന്നില് പറഞ്ഞു.
യുക്രെയ്നിലെ ഡോണെറ്റ്സ്ക്, ലുഹാന്സ്ക്, ഖേഴ്സന്, സപൊറീഷ്യ എന്നീ പ്രദേശങ്ങളാണ് ഹിതപരിശോധന നടത്തി റഷ്യയുടെ ഭാഗമാക്കിയത്. ലുഹാന്സ്കിലും ഡോണെറ്റ്സ്കിലും നേരത്തേ റഷ്യന് അനുകൂല ഭരണകൂടങ്ങളാണ്. ഫെബ്രുവരിയിലെ സൈനിക നടപടിയിലൂടെയാണ് ഖേഴ്സണും സപൊറീഷ്യയും റഷ്യ പിടിച്ചെടുത്തത്.