ചെന്നൈ : തനിക്കെതിരെ സന്യാസി നടത്തിയ പ്രകോപന പ്രസ്താവനക്ക് മറുപടിയുമായി തമിഴ്നാട് മന്ത്രി ഉദയനിധി സ്റ്റാലിന്. സനാതന ധര്മ്മ പരാമര്ശത്തിന്റെ പേരിലാണ്, ഉദയനിധി സ്റ്റാലിന്റെ തല വെട്ടുന്നവര്ക്ക് 10 കോടി പരിതോഷികം നല്കുമെന്ന സന്യാസിയുടെ പ്രകോപന പ്രസ്താവന.എന്നാല് സന്യാസിയുടെ കൈയില് 10 കോടി എങ്ങനെ വരുമെന്നാണ് ഉദയനിധി ചോദിക്കുന്നത്. സന്യാസി ഒറിജിനലോ ഡ്യൂപ്ലിക്കേറ്റോ എന്നും ഉദയനിധി ചോദിച്ചു. തന്റെ തലയ്ക്കു 10 കോടി ഒന്നും വേണ്ട.
10 രൂപയുടെ ചീപ്പു കൊണ്ട് തല ചീകാമെന്നുമായിരുന്നു ഉദയനിധിയുടെ പരിഹാസം.കരുണാനിധിയുടെ കൊച്ചുമകനെ വിരട്ടാന് നോക്കരുതെന്നും സനാതനധര്മത്തിലെ അസമത്വത്തെ ഇനിയും വിമര്ശിക്കുമെന്നും ഉദയനിധി നിലപാട് വ്യക്തമാക്കി. അയോദ്ധ്യയിലെ സന്യാസി ജഗദ്ഗുരു പരമഹംസ ആചാര്യയുടേതായിരുന്നു ഉദയനിധിക്കെതിരെയുള്ള പരാമര്ശം. പ്രതീകാത്മകമായി മന്ത്രിയുടെ ചിത്രം വെട്ടുന്ന വീഡിയോയും സന്യാസി പങ്കുവെച്ചിരുന്നു.
