കൊച്ചി: അറസ്റ്റു വാറണ്ട് നിലനില്ക്കെ സോളാര് കേസിലെ പ്രതി സരിതാ എസ് നായര്ക്ക് ജാമ്യം ലഭിച്ചതില് പൊലീസിന് വീഴ്ച സംഭവിച്ചിട്ടില്ലെന്ന് ആഭ്യന്തരമന്ത്രി രമേശ് ചെന്നിത്തല പറഞ്ഞു. കോടതി നടപടികളുടെ ഭാഗമായാണ് സരിത ജയില് മോചിതയായത്. അതില് സര്ക്കാരിന് യാതൊന്നും ചെയ്യാനില്ലെന്നും അദ്ദേഹം പറഞ്ഞു.ഈ കേസില് സര്ക്കാരിന് ഒരു താല്പര്യങ്ങളും ഇല്ല. നിയമം നിയമത്തിന്റെ വഴിക്ക് പോകും. കോടതിയുടെ മാര്ഗനിര്ദ്ദേശ പ്രകാരമാണ് കേസ് മുന്നോട്ട് പോകുന്നതെന്നും ചെന്നിത്തല പറഞ്ഞു.
സരിതയുടെ സാമ്പത്തിക സ്രോതസ് അന്വേഷിക്കണമെന്ന് ആവശ്യപ്പെട്ട് പ്രതിപക്ഷ നേതാവ് വി എസ് അച്യുതാനന്ദന് നല്കിയ കത്ത് തുടര് നടപടികള്ക്കായി ഡി ജി പിയ്ക്ക് കൈമാറിയിട്ടുണ്ടെന്നും മന്ത്രി അറിയിച്ചു.
സരിതാ എസ് നായര്ക്ക് ജാമ്യം ലഭിച്ചത് വീഴ്ചയാണെന്ന് കെ മുരളീധരന് എം എല് എ പറഞ്ഞിരുന്നു. കേസുകളും വാറണ്ടും നിലനില്ക്കെ സരിതയ്ക്ക് ജാമ്യം ലഭിച്ചത് എങ്ങനെയാണെന്നും അദ്ദേഹം ചോദിച്ചു. സോളാര് കേസ് ജുഡീഷ്യല് അന്വേഷണ പരിധിയില് ആയതിനാല് കൂടുതലൊന്നും പറയുന്നില്ലെന്നും മുരളീധരന് പറഞ്ഞു.
