അഗര്‍ത്തല: ത്രിപുര മുഖ്യമന്ത്രി ബിപ്ലബ് കുമാര്‍ ദേബിനെ വധിക്കാന്‍ ശ്രമിച്ചെന്ന കേസില്‍ മൂന്ന് പേരെ അറസ്റ്റ് ചെയ്തതായി പൊലീസ് അറിയിച്ചു. വ്യാഴാഴ്ച ശ്യാമപ്രസാദ് മുഖര്‍ജി ലെയ്‌നിലെ ഔദ്യോഗിക വസതിക്ക് സമീപം മുഖ്യമന്ത്രിയുടെ സായാഹ്ന നടത്തത്തിനിടെ കാറിടിച്ച്‌ കൊലപ്പെടുത്താന്‍ ശ്രമിച്ചെന്നാണ് കേസ്.
വാഹനം വരുന്നത് കണ്ട് മുഖ്യമന്ത്രി ചാടിമാറിയെന്നും സുരക്ഷ ജീവനക്കാരന് നിസ്സാര പരിക്കേറ്റെന്നും പൊലീസ് അറിയിച്ചു. കാര്‍ തടഞ്ഞുനിര്‍ത്താന്‍ സുരക്ഷ ജീവനക്കാര്‍ ശ്രമിച്ചെങ്കിലും കഴിഞ്ഞില്ല.
വ്യാഴാഴ്ച രാത്രി കെര്‍ചൗമുഹാനി പ്രദേശത്തുനിന്നാണ് മൂന്നുപേരെയും അറസ്റ്റ് ചെയ്തത്. വാഹനവും പിടിച്ചെടുത്തു. മൂന്നുപേരെയും വെള്ളിയാഴ്ച ചീഫ് ജുഡീഷ്യല്‍ മജിസ്ട്രേറ്റ് പി.പി. പോള്‍ മുമ്ബാകെ ഹാജരാക്കി.
ചോദ്യം ചെയ്യലിനായി രണ്ട് ദിവസം പൊലീസ് കസ്റ്റഡിയില്‍ ആവശ്യപ്പെട്ടെങ്കിലും കോടതി ആഗസ്റ്റ് 19 വരെ ജുഡീഷ്യല്‍ കസ്റ്റഡിയില്‍ വിട്ടു. ഏകദേശം 25 വയസ്സുള്ളവരാണ് പിടിയിലായത്.
