സമരങ്ങള്‍ നാടിനെ അപകടപ്പെടുത്തിക്കൊണ്ടാകരുതെന്ന് മുഖ്യമന്ത്രി പിണറായി വിജയന്‍. ഇന്ന് ഒരു മാധ്യമത്തില്‍ ഒരു ഡസന്‍ സ്ഥലത്തെ സമരങ്ങളുടെ ചിത്രങ്ങള്‍ കണ്ടു. ഒരു സുരക്ഷയുമില്ലാതെ പോലീസിനു നേരെ അലറി വിളിച്ച്‌ പാഞ്ഞടുക്കുന്ന ദൃശ്യങ്ങളാണ് കണ്ടത്. ഇത് സമരമല്ല, ഈ നാടിനെ രോഗത്തില്‍ മുക്കിക്കളയാനുള്ള ദുഷ്പ്രവൃത്തിയാണെന്നും അദ്ദേഹം പറഞ്ഞു.
ഒരു പ്രദേശത്തെ ജനതയെ ഗുരുതരവിപത്തിലേക്ക് തള്ളിവിട്ട് എന്ത് രാഷ്ട്രീയനേട്ടമാണ് ഇക്കൂട്ടര്‍ക്ക് നേടാനുള്ളതെന്നും അദ്ദേഹം ചോദിച്ചു. സമരത്തിന് ആരും എതിരല്ല. എന്നാല്‍ അത് നാടിനെ അപകടത്തിലാക്കികൊണ്ട് ആകരുതെന്നും അദ്ദേഹം പറഞ്ഞു.
സമരങ്ങള്‍ ഉദ്ഘാടനം ചെയ്യാന്‍ വരുന്ന, റിവേഴ്സ് ക്വാറന്‍റൈനില്‍ കഴിയേണ്ട നേതാക്കളുടെ ജീവന്‍ അപകടത്തിലാക്കരുത്. പോലീസുമായി മല്‍പ്പിടിത്തം നടത്തുന്ന ഈ സമരം നാടിനെ വിപത്തിലാക്കുന്നതാണെന്ന് നേതാക്കള്‍ക്ക് ചിന്തിക്കാന്‍ കഴിയുന്നില്ലെങ്കില്‍ അണികള്‍ക്കെങ്കിലും കഴിയണമെന്നും മുഖ്യമന്ത്രി കൂട്ടിച്ചേര്‍ത്തു.
