കുഷിനഗര്: ഉത്തര്പ്രദേശില് വിവാഹ ആഘോഷങ്ങള്ക്കിടെ കിണറ്റില് വീണ് സ്ത്രീകളും കുട്ടികളുമടക്കം 13 പേര് മരിച്ചു.
അപകടത്തില് പെട്ട രണ്ട് പേര് ഗുതരാവസ്ഥയില് ചികിത്സയിലാണ്. കിഴക്കന് മേഖലയിലെ കുഷിനഗറിലെ നെബുവ നൗറംഗിയ എന്ന ഗ്രാമത്തിലാണ് ദാരുണസംഭവം ഉണ്ടായിരിക്കുന്നത്. കിണര് മൂടിയ സ്ലാബില് വിവാഹത്തിനെത്തിയവര് ഇരുന്നതിനെ തുടര്ന്ന് സ്ലാബ് പൊട്ടിയാണ് ഇവര് കിണറ്റിലേക്ക് വീണതെന്ന് ഉദ്യോഗസ്ഥര് പറഞ്ഞു.കിണറിന്റെ സ്ലാബില് എല്ലാവരും ഒരുമിച്ച് വന്നിരുന്നതോടെ ഭാരം താങ്ങാനാകാതെ സ്ലാബ് തകര്ന്ന് മുകളില് ഇരുന്നവര് കിണറ്റിലേക്ക് വീഴുകയായിരുന്നു. ഇവരെ ഉടന് ആശുപത്രിയില് എത്തിച്ചെങ്കിലും രക്ഷിക്കാനായില്ല. രണ്ട് പേര്ക്ക് ഗുരുതരമായി പരിക്കേറ്റിട്ടുണ്ട്. മരണസംഖ്യ 13 ആയി ഉയര്ന്നതായി ഗോരഖ്പൂര് സോണിലെ എഡിജി അഖില് കുമാര് വാര്ത്താ ഏജന്സിയായ എഎന്ഐയോട് വ്യക്തമാക്കി.കഴിഞ്ഞ ദിവസം രാത്രി 8.30 ഓടെയായിരുന്നു സംഭവം. അപകടത്തില് മരിച്ച ഓരോരുത്തരുടെയും കുടുംബത്തിന് നാല് ലക്ഷം രൂപ വീതം നഷ്ടപരിഹാരം നല്കുമെന്ന് ജില്ലാ മജിസ്ട്രേറ്റ് അറിയിച്ചു. സംഭവത്തില് അനുശോചനമറിയിച്ച് പ്രധാനമന്ത്രി നരേന്ദ്ര മോദിയും യുപി മുഖ്യമന്ത്രി യോഗി ആദിത്യനാഥും രംഗത്തെത്തി. പരിക്കേറ്റവര്ക്കായി പ്രാര്ഥിക്കുന്നുവെന്നും മോദി ട്വീറ്റ് ചെയ്തു.