തലശേരി-വളവുപാറ (കൂട്ടുപുഴ) അന്തര്‍സംസ്ഥാന പാതയുടെ നവീകരണ പ്രവൃത്തിക്കിടെ മാടത്തിലുണ്ടായ മണ്ണിടിച്ചിലില്‍ തൊഴിലാളി മരിച്ചു. മൂന്നു പേര്‍ക്ക് സാരമായി പരിക്കേറ്റു. കോല്‍ക്കത്ത സ്വദേശി റബി മുര്‍മ്മു (31) ആണ് മരിച്ചത്.
നിര്‍മാണ കമ്ബനിയായ ഇകെകെയുടെ എന്‍ജിനിയര്‍ തൃശൂര്‍ സ്വദേശി എം.പി. അനൂപ് (28), നിര്‍മാണ തൊഴിലാളികളായ ബംഗാളില്‍നിന്നുള്ള ഗണേശന്‍(20), സോമനാഥ് ദാസ് (35) എന്നിവര്‍ക്കാണു പരിക്കേറ്റത്. ഇവരെ ആദ്യം ഇരിട്ടി അമല ആശുപത്രിയിലും പിന്നീട് കണ്ണൂരിലെ സ്വകാര്യ ആശുപത്രിയിലേക്കും മാറ്റി. മാടത്തില്‍ സെന്‍റ് സെബാസ്റ്റ്യന്‍സ് പള്ളിയുടെ പാര്‍ശ്വഭിത്തി കെട്ടിക്കൊടുക്കുന്നതിനായി കോണ്‍ക്രീറ്റ് ചെയ്യുന്നതിന് മണ്ണു നീക്കുന്നതിനിടെ വൈകുന്നേരം നാലോടെയായിരുന്നു അപകടം. അപകടത്തില്‍ പള്ളിയുടെ കോണ്‍ക്രീറ്റ് കൊടിമരവും നിലംപൊത്തി.
മണ്ണിടിഞ്ഞ ഭാഗം റോഡില്‍നിന്നും 15 മീറ്ററോളം ഉയരത്തിലാണ്. മൂന്നുപേര്‍ മണ്ണിനടിയില്‍ പൂര്‍ണമായും അകപ്പെട്ടു. ചെറിയ പരിക്കുകളോടെ രക്ഷപ്പെട്ട സോമനാഥ് ദാസ് അറിയിച്ചതിനെ തുടര്‍ന്ന് നാട്ടുകാരും പോലീസും എത്തിയാണ് രക്ഷാപ്രവര്‍ത്തനം നടത്തിയത്. മണ്ണിനടിയില്‍ തലഭാഗം പകുതിയോളം മൂടിപ്പോയ അനൂപിനെയും ഗണേഷിനെയും നാട്ടുകാരുടെ നേതൃത്വത്തില്‍ മണ്ണു നീക്കി ശ്വസിക്കുന്നതിനുള്ള സൗകര്യമുണ്ടാക്കി.
പോലീസിന്‍റെയും ഇരിട്ടിയില്‍നിന്ന് എത്തിയ അഗ്നിശമന വിഭാഗത്തിന്‍റെയും നാട്ടുകാരുടെയും നേതൃത്വത്തില്‍ ഒന്നരമണിക്കൂറിലധികം നീണ്ട രക്ഷാപ്രവര്‍ത്തനത്തിലൂടെയാണ് ഇരുവരെയും പുറത്തെടുത്തത്. കമിഴ്ന്നു വീണുപോയ റബി മുര്‍മ്മു മണ്‍കൂനയ്ക്കുള്ളില്‍ അകപ്പെട്ടിരുന്നു. പരിക്കേറ്റവരെ രക്ഷപ്പെടുത്തിയശേഷമാണ് മണ്ണിനടിയില്‍നിന്നും റബിയുടെ മൃതദേഹം പുറത്തെടുത്തത്.
