ഇസ്ലാമാബാദ്: മുന്‍ സൈനിക ഏകാധിപതി പര്‍വേസ് മുഷാറഫിനെ അറസ്റ്റ് ചെയ്യാനും അദ്ദേഹത്തിന്‍റെ സ്വത്തുക്കള്‍ കണ്ടുകെട്ടാനും പെഷവാര്‍ ചീഫ് ജസ്റ്റീസ് യാഹ്യാ അഫ്രീഡിയുടെ അധ്യക്ഷതയിലുള്ള മൂന്നംഗബഞ്ച് പാക് സര്‍ക്കാരിന് ഉത്തരവു നല്‍കി. ഇന്നലെ കോടതി ചേര്‍ന്നപ്പോള്‍ പിടികിട്ടാപ്പുള്ളികളെ തിരിച്ചുകൊണ്ടുവരുന്നതിനുള്ള നടപടിക്രമം എന്താണെന്നു ഫെഡറല്‍ അന്വേഷണ ഏജന്‍സിയോടു ജഡ്ജി ആരാഞ്ഞു. തുടര്‍ന്നാണ് അറസ്റ്റിന് ഉത്തരവിട്ടത്.
മാര്‍ച്ച്‌ 21 വരെ സമയം വേണമെന്നു മുഷാറഫിന്‍റെ അഭിഭാഷകന്‍ ആവശ്യപ്പെട്ടെങ്കിലും കോടതി സമ്മതിച്ചില്ല. രാജ്യദ്രോഹക്കേസില്‍ വിചാരണ നേരിടുന്ന മുഷാറഫ് ഇപ്പോള്‍ ദുബായിലാണ്. അടിയന്തരാവസ്ഥ പ്രഖ്യാപിക്കുകയും നൂറോളം ജഡ്ജിമാരെ പുറത്താക്കുകയും ഉന്നതകോടതികളിലെ മുതിര്‍ന്ന ജഡ്ജിമാരെ വീട്ടുതടങ്കലിലാക്കുകയും ചെയ്തതിന്‍റെ പേരിലാണു മുഷാറഫിനെതിരേ കേസെടുത്തത്. 2016മാര്‍ച്ചില്‍ രാജ്യം വിട്ട മുഷാറഫിനെ നേരത്തെ പിടികിട്ടാപ്പുള്ളിയായി കോടതി പ്രഖ്യാപിച്ചിരുന്നു.
