തിരുവനന്തപുരം: ബജറ്റ് ദിനത്തില് നിയമസഭയിലെ കയ്യാങ്കളി കേസ് പിന്വലിക്കുന്നതിനെതിരെ പ്രതിപക്ഷ നേതാവ് രമേശ് ചെന്നിത്തല കോടതിയില് തടസവാദം ഉന്നയിക്കും. കയ്യാങ്കളി കേസ് പിന്വലിക്കുന്ന വിവരം ഇന്ന് തിരുവനന്തപുരം സിജെഎം കോടതിയില് സര്ക്കാര് ഉന്നയിക്കും. ഇതിനെതിരെയാണ് പ്രതിപക്ഷ നേതാവ് തടസ ഹര്ജി നല്കുന്നത്.
കഴിഞ്ഞ യുഡിഎഫ് സര്ക്കാരിന്റെ കാലത്ത് ധനമന്ത്രിയായിരുന്ന കെ.എം.മാണിക്കെതിരെ ഉയര്ന്ന ബാര്കോഴ ആരോപണത്തിന്റെ പേരിലാണ് നിയമസഭയില് പ്രതിപക്ഷം കയ്യാങ്കളി നടത്തുകയും സ്പീക്കറുടെ ഡയസും കസേരയും തകര്ത്തത്. 2015 മാര്ച്ച് 13-നായിരുന്നു കേസിനാസ്പദമായ സംഭവം നടന്നത്. ധനമന്ത്രിയായിരുന്ന മാണി ബജറ്റ് അവതരിപ്പിക്കുന്നതിനെതിരേ തുടങ്ങിയ പ്രതിപക്ഷ പ്രതിഷേധമാണ് കയ്യാങ്കളിയിലും അക്രമത്തിലും കലാശിച്ചത്.
സംഭവത്തില് എല്ഡിഎഫിലെ വി.ശിവന്കുട്ടി, ഇ.പി.ജയരാജന്, കെ.ടി.ജലീല് ഉള്പ്പെടെ ആറ് പേര്ക്കെതിരെയാണ് ക്രൈംബ്രാഞ്ച് കുറ്റപത്രം സമര്പ്പിച്ചിരുന്നത്. രണ്ട് ലക്ഷം രൂപയുടെ പൊതുമുതല് നശിപ്പിച്ചുവെന്നായിരുന്നു ക്രൈംബ്രാഞ്ചിന്റെ കണ്ടെത്തല്. കയ്യാങ്കളി കേസ് പിന്വലിക്കണമെന്നാവശ്യപ്പെട്ട് വി.ശിവന്കുട്ടി മുഖ്യമന്ത്രി പിണറായി വിജയന് നല്കിയ അപേക്ഷ പരിഗണിച്ചാണ് കേസ് പിന്വലിക്കാന് സര്ക്കാര് തീരുമാനിച്ചത്.