തിരുവനന്തപുരം: ട്രാക്ക് അറ്റകുറ്റപ്പണികള്‍ നടക്കുന്നതിനാല്‍ സംസ്ഥാനത്ത് നാലു ദിവസം പകല്‍ സമയങ്ങളില്‍ ട്രെയിന്‍ ഗതാഗതത്തിനു നിയന്ത്രണം ഏര്‍പ്പെടുത്തിയതായി റെയില്‍വേ അറിയിച്ചു. ഞായറാഴ്ചയും 10, 12, 13 തീയതികളിലുമാണ് നിയന്ത്രണം.
ഇതിന്‍റെ ഭാഗമായി ഈ ദിവസങ്ങളില്‍ ഗുരുവായൂര്‍-ചെന്നൈ എഗ്മോര്‍ എക്സ്പ്രസ് രണ്ടു മണിക്കൂര്‍ വൈകി രാത്രി 11.25 നു മാത്രമേ ഗുരുവായൂരില്‍ നിന്നും പുറപ്പെടുകയുള്ളൂവെന്ന് റെയില്‍വേ അറിയിച്ചു. മംഗലാപുരം-തിരുവനന്തപുരം എക്സ്പ്രസ് തൃശൂര്‍ സ്റ്റേഷനില്‍ ഒന്നര മണിക്കൂര്‍ പിടിച്ചിടും. ബിലാസ്പൂര്‍-തിരുനെല്‍വേലി എക്സ്പ്രസ് രണ്ടര മണിക്കൂറും ഹസ്രത് നിസാമുദീന്‍-തിരുവനന്തപുരം എക്സ്പ്രസ് അരമണിക്കൂറും തൃശൂര്‍ സെക്ഷനില്‍ പിടിച്ചിടും. ഹൈദരാബാദ്-കൊച്ചുവേളി എക്സ്പ്രസ് ട്രെയിന്‍ പാലക്കാട് ഡിവിഷനില്‍ രണ്ടു മണിക്കൂര്‍ പിടിച്ചിടുമെന്നും റെയില്‍വേ പത്രക്കുറിപ്പില്‍ അറിയിച്ചു.
