തിരുവനന്തപുരം: തൃശൂര് ചാവക്കാട്ട് കോണ്ഗ്രസ് പ്രവര്ത്തകന്റെ കൊലപാതകത്തില് ഉന്നത പോലീസ് ഉദ്യോഗസ്ഥന്റെ നേതൃത്വത്തില് അന്വേഷണം നടത്തണമെന്ന് പ്രതിപക്ഷ നേതാവ് രമേശ് ചെന്നിത്തല. എസ്ഡിപിഐക്കെതിരായ ആരോപണത്തില് അന്വേഷണം നടത്തണം. കുറ്റവാളികളെ ഉടന് പിടികൂടണമെന്നും പ്രതിപക്ഷ നേതാവ് ആവശ്യപ്പെട്ടു.
വെട്ടേറ്റു ചികിത്സയില് കഴിഞ്ഞിരുന്ന കോണ്ഗ്രസ് പ്രവര്ത്തകന് ഇന്ന് രാവിലെയാണ് മരിച്ചത്. കോണ്ഗ്രസിന്റെ ബൂത്ത് പ്രസിഡന്റ് കൂടിയായ പുതുവീട്ടില് നൗഷാദ് ആണ് മരിച്ചത്. ചൊവ്വാഴ്ച വൈകിട്ട് പുന്ന സെന്ററില് വച്ച് നൗഷാദ് ഉള്പ്പെടെ നാലു പേര്ക്ക് വെട്ടേല്ക്കുകയായിരുന്നു. മറ്റ് മൂന്നു പേരും തൃശൂര് എലൈറ്റ് ആശുപത്രിയില് ചികിത്സയിലാണ്.
എസ്ഡിപിഐ പോപ്പുലര് ഫ്രണ്ട് പ്രവര്ത്തകരാണ് ഇവരെ ആക്രമിച്ചതെന്ന് കോണ്ഗ്രസ് ആരോപിച്ചുവെങ്കിലും എസ്ഡിപിഐ ഇത് നിഷേധിച്ചിരുന്നു. നിരവധി ക്രിമിനല് കേസുകളില് പ്രതിയായ നൗഷാദിന് ഒട്ടേറെ ശത്രുക്കളുണ്ട്. അവരാണ് ആക്രമണം നടത്തിയതെന്നാണ് എസ്ഡിപിഐയുടെ മറുപടി.
നേരത്തെ, സിപിഎം പ്രവര്ത്തകനായിരുന്ന നൗഷാദ് പിന്നീട് കോണ്ഗ്രസ് പാര്ട്ടിയില് ചേരുകയായിരുന്നു.
