ന്യൂഡല്ഹി: സ്റ്റാഫ് സെലക്ഷന് കമ്മീഷന്റെ (എസ്എസ്സി) കംബൈന്ഡ് ഗ്രാജ്വേറ്റ് ലെവല് പരീക്ഷയുടെ ചോദ്യപേപ്പര് ചോര്ന്ന വിഷയത്തില് സുപ്രീം കോടതി കേന്ദ്രസര്ക്കാരിന് നോട്ടീസ് അയച്ചു. സംഭവത്തില് വിശദീകരണം ആവശ്യപ്പെട്ടാണ് സുപ്രീം കോടതി നോട്ടീസ് നല്കിയിരിക്കുന്നത്. മാര്ച്ച് 19ന് മുന്പ് വിശദീകരണം നല്കണമെന്നും കോടതി ഉത്തരവിട്ടു.
എസ്എസ്സി ചോദ്യപേപ്പര് ചോര്ന്ന സംഭവത്തില് കേന്ദ്രസര്ക്കാര് സിബിഐ അന്വേഷണം പ്രഖ്യാപിച്ചിരുന്നു. സിബിഐ അന്വേഷണം ആവശ്യപ്പെട്ട് വിവിധ സംസ്ഥാനങ്ങളില് നിന്നുള്ള വിദ്യാര്ഥികള് സമരം നടത്തിയതിന്റെ പശ്ചാത്തലത്തിലായിരുന്നു സര്ക്കാര് നടപടി.
ഫെബ്രുവരി 17 മുതല് 21 വരെ നടന്ന പരീക്ഷയുടെ ചോദ്യപേപ്പര് ചോര്ന്നെന്നാണ് പരാതി. ഇതേത്തുടര്ന്ന് വിദ്യാര്ഥികള് എസ്എസ്സി ആസ്ഥാനത്ത് സമരം തുടങ്ങിയതോടെയാണ് വിഷയം രൂക്ഷമായത്. സംഭവം വിവാദമായതിനെത്തുടര്ന്ന് പരീക്ഷ കമ്മീഷന് റദ്ദാക്കിയിരുന്നു.