ദില്ലി: സിബിഐ ഇടക്കാല ഡയറക്ടറുടെ നിയമനത്തിനെതിരായ ഹര്ജി അടിയന്തരമായി കേള്ക്കാനാവില്ലെന്ന് സുപ്രീംകോടതി. തിങ്കളാഴ്ച ഉള്പ്പെടുത്താന് ശ്രമിക്കുമെന്നും ചീഫ് ജസ്റ്റിസ് അറിയിച്ചു. ഉന്നതാധികാര സമിതി അറിയാതെയാണ് നാഗേശ്വരറാവുവിന്റെ നിയമനമെന്ന് ആരോപിച്ച് ‘കോമണ് കോസ്’ സമര്പ്പിച്ച ഹര്ജിയിലാണ് സുപ്രിംകോടതി നിലപാടറിയിച്ചിരിക്കുന്നത്.
പ്രധാനമന്ത്രിയുടെ വീട്ടില് ചേര്ന്ന സെലക്ഷന് കമ്മിറ്റി യോഗത്തിന്റെ തീരുമാന പ്രകാരമാണ് സിബിഐ ഡയറക്ടര് സ്ഥാനത്ത് നിന്നും അലോക് വര്മ്മയെ മാറ്റി ഇടക്കാല മേധാവിയായി എം നാഗേശ്വര റാവുവിനെ നിയമിച്ചത്.
സുപ്രിംകോടതി വിധിയുടെ ബലത്തില് വീണ്ടും ചുമതലയേറ്റ് 36 മണിക്കൂറിനുള്ളിലാണ് അലോക് വര്മ്മയ്ക്ക് സിബിഐ ഡയറക്ടര് സ്ഥാനം നഷ്ടപ്പെട്ടത്. പ്രധാനമന്ത്രിയും ചീഫ്ജസ്റ്റിസിന്റെ പ്രതിനിധി ജസ്റ്റിസ് എ കെ സിക്രിയും യോജിച്ചപ്പോള് കോണ്ഗ്രസ് നേതാവ് മല്ലികാര്ജ്ജുന ഖര്ഗെ തീരുമാനത്തോട് വിയോജിച്ചിരുന്നു.
