ഫോട്ടെ: കടപ്പാട് മാതൃഭൂമി
വയനാട് മേപ്പാടി മുണ്ടക്കൈയിലും ചൂരല്മലയിലും ഉണ്ടായ വന് ഉരുള്പൊട്ടലില് മരണം 65 കടന്നു. മരിച്ചവരില് മൂന്നു കുട്ടികളും ഉള്പ്പെടും. നിരവധി പേരെ കാണാതായതായാണ് വിവരം. ഉരുള്പൊട്ടലില് മരിച്ചവരില് ഒരു വിദേശിയും ഉള്പ്പെടുന്നതായി റിപ്പോര്ട്ടുകളുണ്ട്.
മുണ്ടക്കൈ, അട്ടമല, ചൂരല്മല എന്നിവിടങ്ങളിലാണ് ഉരുള്പൊട്ടലുണ്ടായത്. പാലം തകര്ന്നതോടെ മുണ്ടക്കൈയും ചൂരല്മലയും ഒറ്റപ്പെട്ടു.
ചൂരല്മലയില് നിന്ന് 11 മൃതദേഹങ്ങള് കിട്ടിയിട്ടുണ്ട്. ഉരുള്പൊട്ടലില് നിരവധി ആളുകള്ക്ക് പരിക്കേറ്റിട്ടുണ്ട്. മേപ്പാടിയിലെ സ്വകാര്യ ആശുപത്രിയില് 33 പേര് ചികിത്സ തേടി.
400 ഓളം കുടുംബങ്ങള് ഒറ്റപ്പെട്ടു. നിരവധി വീടുകള് ഒലിച്ചുപോയി. 10 തോട്ടം തൊഴിലാളികളെ കാണാതായതായി ഹാരിസണ്സ് അറിയിച്ചു.
മുണ്ടക്കൈയില് മാത്രം 300 ഓളം കുടുംബങ്ങളെയാണ് ഉരുള്പൊട്ടല് ബാധിച്ചത്. മുണ്ടക്കൈ ട്രീവാലി റിസോര്ട്ടില് 100 ഓളം പേര് കുടുങ്ങിക്കിടക്കുന്നതായാണ് റിപ്പോര്ട്ടുകള്.
