പെരിന്തല്‍മണ്ണ: നഗരസഭയില്‍ സെപ്റ്റംബര്‍ ആറു മുതല്‍ നടപ്പായ ഗതാഗത പരിഷ്കാരത്തില്‍ യാത്രക്കാരും വ്യാപാരികളും ബസുടമകളും അനുഭവിക്കുന്ന പ്രയാസങ്ങള്‍ പരിഹരിക്കാന്‍ പെരിന്തല്‍മണ്ണ മര്‍ച്ചന്‍റ്സ് അസോസിയേഷന്‍ മുന്‍കൈ എടുത്ത് സര്‍വക്ഷി യോഗം വിളിച്ചു.
വെള്ളിയാഴ്ച വൈകീട്ട് നാലിന് പെരിന്തല്‍മണ്ണ വ്യാപാരി ഭവനിലാണ് യോഗം നടക്കുക. ഊട്ടി റോഡ് വഴി പെരിന്തല്‍മണ്ണയിലെത്തുന്ന ബസുകള്‍ക്ക് നഗരത്തില്‍ പ്രവേശിക്കാന്‍ സൗകര്യമുണ്ടാക്കലും നഗരത്തിലെ പ്രധാന സ്ഥലങ്ങളില്‍ ബസ് സ്റ്റോപ് നിലനിര്‍ത്തലുമാണ് പൊതു ആവശ്യം. പരിഷ്കാരം നടപ്പാക്കിയ ശേഷം പെരിന്തല്‍മണ്ണയിലെത്തുന്ന സാധാരണക്കാരായ യാത്രക്കാര്‍ ഏറെ കഷ്ടപ്പെടുകയാണ്.
എല്ലാവരും ഒാട്ടോറിക്ഷയെ ആശ്രയിക്കേണ്ട സ്ഥിതിയാണ്. ആശുപത്രികള്‍, സര്‍ക്കാര്‍ ഒാഫിസുകള്‍ എന്നിവിടങ്ങളിലെത്തുന്നവരും നഗരത്തിലെ ഷോപ്പുകളിലും മറ്റും ചെറിയ വരുമാനത്തിന് തൊഴിലെടുക്കുന്നവരുമാണ് ഏറെ കഷ്ടപ്പെടുന്നത്.
ഇക്കാര്യങ്ങള്‍ നഗരസഭയെ അറിയിച്ചപ്പോള്‍ സര്‍വകക്ഷി യോഗം വിളിച്ച്‌ ചര്‍ച്ച ചെയ്യാമെന്ന് പറഞ്ഞിരുന്നെങ്കിലും നടപടിയുണ്ടായില്ല. നഗരസഭയുടെ തീരുമാനങ്ങള്‍ക്കെതിരെ പൊതുജനങ്ങളെയും വിവിധ സംഘടനകളെയും ഏകോപിപ്പിച്ച്‌ മുന്നോട്ട് പോവാനാണ് സര്‍വകക്ഷി യോഗം.
വിവിധ രാഷ്ട്രീയ, സാമൂഹിക, സന്നദ്ധ സംഘടനകള്‍, വിദ്യാര്‍ഥി, യുവജന, തൊഴിലാളി പ്രതിനിധികള്‍, ബസുടമകള്‍, പാസഞ്ചേഴ്സ് അസോസിയേഷന്‍ തുടങ്ങിയവയുടെ പ്രതിനിധികളെയും ക്ഷണിച്ചിട്ടുണ്ട്.
