കൊച്ചി: കോവിഡില്‍ തളര്‍ന്ന കേരളത്തിെന്‍റ വിനോദസഞ്ചാര മേഖലക്ക് ഉണര്‍ത്തുപാട്ടുമായി ആദ്യ ക്രൂയിസ് കപ്പല്‍ ഇന്ന് കൊച്ചിയില്‍. മുംബൈയില്‍നിന്ന് 1200 യാത്രികരെയും വഹിച്ച്‌ കോര്‍ഡിലിയ കപ്പലാണ് രാവിലെ ആറിന് പുതിയ ക്രൂയിസ് ടെര്‍മിനലില്‍ എത്തുക. മുംെബെയില്‍നിന്ന് ലക്ഷദ്വീപിലേക്ക് പോകുന്ന ആഡംബര നൗകയാണ് കൊച്ചിയില്‍ ഒരു പകല്‍ നങ്കൂരമിടുന്നത്.
2020 മാര്‍ച്ചിലാണ് അവസാന വിനോദസഞ്ചാര കപ്പല്‍ കൊച്ചിയില്‍ എത്തിയത്. കോവിഡ് പിടിമുറുക്കിയതോടെ മേഖല നിശ്ചലമായി. വര്‍ഷത്തില്‍ 25,000 വിനോദസഞ്ചാരികളാണ് ആഡംബര കപ്പല്‍ വഴിയില്‍ കൊച്ചി കാണാന്‍ എത്തിയിരുന്നത്. മുംബൈ കഴിഞ്ഞാല്‍ ഏറ്റവുമധികം വിനോദസഞ്ചാര കപ്പലുകള്‍ നങ്കൂരമിട്ടിരുന്നതും കൊച്ചിയിലാണ്. ഹോംസ്റ്റേ, റിസോര്‍ട്ട്, വഴിയോര കച്ചവടക്കാര്‍ തുടങ്ങി 10,000ത്തിലേറെ പേരുടെ ഉപജീവനമാര്‍ഗമാണ് ആഡംബര കപ്പല്‍ വഴിയെത്തുന്ന സഞ്ചാരികള്‍.
മാസത്തില്‍ രണ്ടു കപ്പലുകള്‍ കൊച്ചിവഴി സര്‍വിസ് നടത്താന്‍ കോര്‍ഡിലിയ ക്രൂയിസസ് ഒരുങ്ങുന്നുണ്ടെന്ന് ടൂറിസം വകുപ്പ് അധികൃതര്‍ അറിയിച്ചു. സഞ്ചാരികളുടെ എണ്ണമനുസരിച്ച്‌ ഇത് ആഴ്ചയില്‍ ഒന്നായി ഉയരാനും സാധ്യതയുണ്ട്. ബുധനാഴ്ച എത്തുന്ന കപ്പലിലെ 800ല്‍പരം യാത്രികര്‍ കൊച്ചിയിലെയും സമീപങ്ങളിലെയും വിനോദസഞ്ചാര കേന്ദ്രങ്ങള്‍ സന്ദര്‍ശിക്കുമെന്ന് പ്രാദേശിക ടൂര്‍ ഏജന്‍റ് കേരള വോയേജസ് അറിയിച്ചു. കോവിഡ് അടച്ചിടലിനുശേഷം ആദ്യമായി കേരളത്തിലെത്തുന്ന സഞ്ചാരികള്‍ക്ക് സംസ്ഥാന വിനോദസഞ്ചാര വകുപ്പ്, പോര്‍ട്ട് ട്രസ്റ്റ് എന്നിവര്‍ ചേര്‍ന്ന് സ്വീകരണം ഒരുക്കും.
രാവിലെ 7.30ന് യാത്രികര്‍ ഉല്ലാസനൗകയില്‍നിന്ന് പുറത്ത് ഇറങ്ങും. കപ്പല്‍ ലക്ഷദ്വീപിലേക്ക് യാത്ര തുടരുമെങ്കിലും 40 ശതമാനം വിനോദ സഞ്ചാരികളും കൊച്ചിയില്‍ ഇറങ്ങും. തുടര്‍ന്ന് കേരളത്തിലെ വിനോദസഞ്ചാര മേഖലകളിലേക്കാണ് ഇവര്‍ യാത്ര ചെയ്യുക. നവംബറോടെ വിദേശ ആഡംബര കപ്പലുകളും കൊച്ചിയില്‍ എത്തുമെന്നാണ് പ്രതീക്ഷ.
