സംസ്ഥാന ബജറ്റിലെ നികുതി വർധനയ്ക്കെതിരെ പ്രതിഷേധം കൂടുതൽ ശക്തമാകുന്നു. നാളെ നിയമസഭയിലും നികുതി വർധന രൂക്ഷമായ വാദപ്രതിവാദങ്ങൾക്ക് വഴിവയ്ക്കും. യൂത്ത് കോൺഗ്രസ് നാളെ നിയമസഭയിലേക്ക് പ്രതിഷേധ മാർച്ചും പ്രഖ്യാപിച്ചിട്ടുണ്ട്. അതേസമയം നികുതി വർധനയെ ന്യായീകരിച്ച് ധനമന്ത്രി വീണ്ടും രംഗത്തെത്തി.
നികുതി വർധനയിൽ പ്രതിപക്ഷ പാർട്ടികൾ ശക്തമായ സമരങ്ങൾക്കാണ് തയ്യാറെടുക്കുന്നത്. മുന്നണിക്ക് അകത്തു നിന്ന് പോലും വലിയ വിമർശനങ്ങൾ നേരിടുന്നുണ്ട്. നികുതി വർധന വെറും നിർദ്ദേശം മാത്രമാണെന്നും ചർച്ചചെയ്താവും അന്തിമ തീരുമാനമെന്നും സിപിഐഎം വ്യക്തമാക്കിയിരുന്നു. വലിയ വിമർശനം ഉയർന്ന പശ്ചാത്തലത്തിലായിരുന്നു മുന്നണി നേതാക്കളുടെ പ്രതികരണം. ബജറ്റിൻമേലുള്ള ചർച്ചയിൽ രണ്ട് രൂപ എന്ന നിർദേശം ഒരു രൂപയായി കുറയ്ക്കുമെന്ന സൂചനയുണ്ടായിരുന്നു.