പേപ്പട്ടികളെയും അക്രമകാരികളായ തെരുവുനായകളെയും കൊല്ലാന് അനുവദിക്കണമെന്ന് സംസ്ഥാന സര്ക്കാര് സുപ്രീം കോടതിയോട് ആവശ്യപ്പെട്ടു. തെരുവുനായകള് കാരണം ഇപ്പോള് ഉണ്ടായിരിക്കുന്ന അടിയന്തിര പ്രതിസന്ധി പരിഹരിക്കുന്നതിന് എ.ബി.സി (അനിമല് ബര്ത്ത് കണ്ട്രോള്) പദ്ധതി നടപ്പാക്കാന് കുടുംബശ്രീ യൂണിറ്റുകളെ അനുവദിക്കണമെന്നും സംസ്ഥാന സര്ക്കാര്. സുപ്രീം കോടതിയില് ഫയല് ചെയ്ത അപേക്ഷയിലാണ് സര്ക്കാര് ഈ ആവശ്യം ഉന്നയിച്ചിരിക്കുന്നത്.
മൃഗങ്ങളില് നിന്ന് മനുഷ്യരിലേക്ക് പകരുന്ന അസുഖങ്ങള് വ്യാപിക്കുമ്പോള്, രോഗ വ്യാപികളായ മൃഗങ്ങളെയും, പക്ഷികളെയും കൊല്ലാറുണ്ട്. എന്നാല് നിലവില് കേന്ദ്ര ചട്ടങ്ങള് അനുവദിക്കാത്തതിനാല് പേപ്പട്ടികളെയും അക്രമകാരികളുമായ തെരുവുനായകളെയും കൊല്ലാറില്ല. ഇവരെ പ്രത്യേക സ്ഥലങ്ങളിലേക്ക് മാറ്റി മരണം വരെ ഒറ്റപ്പെടുത്തി പാര്പ്പിക്കുകയാണ് ചെയ്യുന്നത്. എന്നാല് സംസ്ഥാന നിയമങ്ങളും ചട്ടങ്ങളും പ്രകാരം പേപ്പട്ടികളെയും അക്രമകാരികളുമായി തെരുവ് നായകളെയും കൊല്ലാം. ഈ സാഹചര്യത്തില് ഇത്തരം തെരുവുനായകളെ കൊല്ലാന് അനുമതി നല്കണമെന്നാണ് സംസ്ഥാന സര്ക്കാര് ആവശ്യപ്പെട്ടിരിക്കുന്നത്.
നിലവിലെ നിയമം അനുസരിച്ച് സംസ്ഥാനത്തെ തെരുവുനായ്ക്കളെ നിയന്ത്രിക്കാന് വേണ്ട നടപടികളെടുക്കാന് സര്ക്കാറിന് കഴിയുന്നില്ല. പേവിഷബാധയേറ്റുള്ള മരണം സംസ്ഥാനത്ത് റിപ്പോര്ട്ട് ചെയ്യുന്ന സാഹചര്യം കൂടി പരിഗണിച്ച് നടപടി സ്വീകരിക്കണമെന്നും സര്ക്കാര് ഹരജിയില് ആവശ്യപ്പെട്ടു.
നിലവില് തെരുവ് നായകളെ നിയന്ത്രിക്കുന്നതുമായി ബന്ധപ്പെട്ട ഹരജി സുപ്രിം കോടതി പരിഗണിച്ചുകൊണ്ടിരിക്കുകയാണ്. കേരളത്തില് നിന്നുള്ള വി.കെ ബിജുവാണ് ഇക്കാര്യവുമായി ബന്ധപ്പെട്ട് സുപ്രിം കോടതിയെ സമീപിച്ചത്.