കരുവന്നൂര് സഹകരണ ബാങ്ക് തട്ടിപ്പ് കേസില് ബാങ്ക് ഭരണ സമിതിക്കെതിരെ കേസിലെ പ്രതികള് രംഗത്ത്. ഭരണ സമിതിയുടെ നിര്ദേശപ്രകാരമാണ് എല്ലാം ചെയ്തതെന്ന് പ്രതികള് മുന്കൂര് ജാമ്യാപേക്ഷയില് പറഞ്ഞു. കേസിലെ പ്രതികളായ ബിജോയ്, സുനില്കുമാര് എന്നിവരുടെ മുന്കൂര് ജാമ്യാപേക്ഷ ഹൈക്കോടതി ഇന്ന് പരിഗണിക്കും. അതിനിടെ പ്രതികള്ക്കെതിരെ ഗൂഡാലോചന കുറ്റം ചുമത്താത്തതിനെതിരെ ബിജെപിയും രംഗത്തെത്തി.
ബാങ്ക് തട്ടിപ്പില് ബിജു കരിം, ജില്സ്, റെജി അനില് എന്നിവരുടെ ജാമ്യാപേക്ഷയിലാണ് ഭരണസമിതിക്കെതിരെ പ്രതിഭാഗം നിലപാട് വ്യക്തമാക്കിയത്. ചെയ്തതെല്ലാം സിപിഐഎം നേതൃത്വത്തിലുള്ള ഭരണസമിതിയുടെ നിര്ദേശപ്രകാരമാണ്. ഇപ്പോള് തങ്ങളെ ബലിയാടാക്കുകയാണെന്നാണ് പ്രതിഭാഗത്തിന്റെ വാദം. മൂന്നുപ്രതികളുടെയും മുന്കൂര് ജാമ്യാപേക്ഷയില് തൃശൂര് ജില്ലാ സെഷന്സ് കോടതി നാളെ വിധി പറയും.