സിപിഐഎം സ്ഥാനാര്ഥിക്കായി തപാല് വോട്ട് പൊട്ടിച്ച് തിരുത്തിയെന്ന മുതിര്ന്ന സിപിഐഎം നേതാവ് ജി സുധാകരന്റെ വിവാദ പ്രസംഗത്തില് കേസെടുത്ത പൊലീസ് ഇന്ന് നടപടികളിലേക്ക് കടക്കും. ഇന്ന് പൊലീസ് ജി സുധാകരന്റെ മൊഴി രേഖപ്പെടുത്തിയേക്കും. ആലപ്പുഴ സൗത്ത് പോലീസാണ് ജില്ലാ വരണാധികാരിയായ കളക്ടറുടെ പരാതിയില് കേസെടുത്തത്. ബൂത്ത് പിടിച്ചെടുത്തത് മുതല് വ്യാജരേഖ ചമച്ചത് വരെയുള്ള വകുപ്പുകള് ചുമത്തിയാണ് എഫ് ഐ ആര് ഉള്ളത്.
അതേസമയം, പൊലീസ് തിടുക്കത്തില് നടപടികളിലേക്ക് കടന്നതില് അസ്വസ്ഥനാണ് ജി സുധാകരന്. നിയമോപദേശം ലഭിച്ച് മിനുട്ടുകള്ക്കകം എഫ് ഐ ആര് പുറത്ത് വന്നു. ഇത് ഉന്നതതല ഇടപെടല് ഉണ്ടായതായി സുധാകരനുമായുള്ള അടുത്ത വൃത്തങ്ങള് കരുതുന്നു. പ്രശ്നം സജീവമായി തുടരുമ്പോഴും പാര്ട്ടി നേതാക്കളാരും സുധാകരനെ ബന്ധപ്പെട്ടിട്ടില്ല. കേസെടുത്തതിന് ശേഷം ജി സുധാകരന് പ്രതികരിച്ചിട്ടുമില്ല.
