മാന്ഡോസ് ചുഴലിക്കാറ്റ് ദുര്ബലമായെങ്കിലും സംസ്ഥാനത്ത് മഴ തുടരുമെന്ന് കാലാവസ്ഥ വകുപ്പ്. വരും മണിക്കൂറുകളില് ശക്തമായ മഴയ്ക്കും കാറ്റിനും സാദ്ധ്യതയുണ്ടെന്ന് മുന്നറിയിപ്പുണ്ട്. മാന്ഡോസ് ചുഴലിക്കാറ്റ് ചക്രവാതച്ചുഴിയായി വടക്കന് തമിഴ്നാടിനും തെക്കന് കര്ണാടകത്തിനും വടക്കന് കേരളത്തിനും മുകളിലായി സ്ഥിതിചെയ്യുന്നതാണ് മഴയ്ക്ക് കാരണം.
തിരുവനന്തപുരം, കൊല്ലം, പത്തനംതിട്ട ജില്ലകളിലൊഴികെ ഇന്ന് യെല്ലോ അലേര്ട്ട് പ്രഖ്യാപിച്ചിട്ടുണ്ട്. ആലപ്പുഴ, എറണാകുളം, തൃശൂര് ജില്ലകളില് ശക്തമായ മഴയാണ് ലഭിച്ചുകൊണ്ടിരിക്കുന്നത്.ചക്രവാതചുഴി വടക്കന് കേരള-കര്ണാടക തീരം വഴി തെക്ക് കിഴക്കന് അറബികടലില് പ്രവേശിച്ച് ഡിസംബര് 13 ഓടെ ന്യുനമര്ദ്ദമായി ശക്തി പ്രാപിച്ച് ഇന്ത്യന് തീരത്ത് നിന്ന് അകന്നു പോകാനാണ് സാദ്ധ്യത.
കേരള-കര്ണാടക-ലക്ഷദ്വീപ് തീരങ്ങളില് ഡിസംബര് 13 വരെ മത്സ്യബന്ധനത്തിന് പോകാന് പാടില്ല എന്നും കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്.
