വാഷിംഗ്ടണ്‍ ഡിസി: കോവിഡ് പ്രതിരോധ വാക്സിന്‍റെ ബൂസ്റ്റര്‍ ഡോസ് സ്വീകരിച്ച്‌ അമേരിക്കന്‍ പ്രസിഡന്‍റ് ജോ ബൈഡന്‍. തിങ്കളാഴ്ചയാണ് ബൈഡന്‍ ഫൈസര്‍ വാക്സിന്‍റെ മൂന്നാം ഡോസ് ബൂസ്റ്റര്‍ ഡോസായി സ്വീകരിച്ചത്.
ഈ പകര്‍ച്ചവ്യാധിയെ ചെറുക്കാനും ജീവന്‍ രക്ഷിക്കാനും, നമ്മുടെ കുട്ടികളെ സുരക്ഷിതമായി നിലനിര്‍ത്താനും, നമ്മുടെ വിദ്യാലയങ്ങള്‍ തുറക്കാനും, നമ്മുടെ സന്പദ്‌വ്യവസ്ഥ മുന്നോട്ട് കൊണ്ടുപോകാനും, എല്ലാവര്‍ക്കും പ്രതിരോധ കുത്തിവയ്പ്പ് നല്‍കണമെന്ന് ഞങ്ങള്‍ക്കറിയാമെന്നും ബൈഡന്‍ വാക്സിന്‍ സ്വീകരിക്കുന്നതിന് മുന്നോടിയായി പറഞ്ഞു.
വാക്സിന്‍ സ്വീകരിക്കുന്നതിലൂടെ നിങ്ങളുടെ ജീവന്‍ രക്ഷിക്കാനും നിങ്ങളുടെ ചുറ്റുമുള്ളവരുടെ ജീവന്‍ രക്ഷിക്കാനും കഴിയുമെന്നും ബൈഡന്‍ കൂട്ടിച്ചേര്‍ത്തു.
അമേരിക്കയില്‍ മുതിര്‍ന്ന പൗരന്മാര്‍ക്ക് ബൂസ്റ്റര്‍ ഡോസ് നല്‍കാന്‍ കഴിഞ്ഞ ആഴ്ചയാണ് അനുമതി നല്‍കിയത്. കോവിഡ് പ്രതിരോധ വാക്സിനായ ഫൈസര്‍ വാക്സീനാണ് ബൂസ്റ്റര്‍ ഡോസായി നല്‍കുന്നത്.
65 വയസിനു മുകളിലുള്ളവര്‍ക്കും ഗുരുതരരോഗങ്ങളുള്ളവര്‍ക്കുമാണ് വാക്സീന്‍ നല്‍കുന്നത്. രണ്ടാം ഡോസ് എടുത്ത് ആറുമാസത്തിനുശേഷമാണ് മൂന്നാം ഡോസ് ബൂസ്റ്റര്‍ ഡോസായി നല്‍കുന്നത്.
