മൊഹാലിയിലെ സ്വകാര്യ സര്വകലാശാലയിലെ വനിതാ ഹോസ്റ്റലില് വിദ്യാര്ഥിനികളുടെ ശുചിമുറി ദൃശ്യങ്ങള് ചോര്ന്നെന്നു പരാതി ഉയര്ന്ന സംഭവത്തില് രണ്ടു പേര് കൂടി അറസ്റ്റില്.നേരത്തെ അറസ്റ്റിലായ സര്വകലാശാലയിലെ എംബിഎ ഒന്നാം വര്ഷ വിദ്യാര്ഥിനിയുടെ ആണ്സുഹൃത്തും ഷിംല സ്വദേശിയയായ മറ്റൊരാളുമാണ് അറസ്റ്റിലായത്.
പ്രതിഷേധം കടുത്തതോടെ ഈ മാസം 24 വരെ സര്വകലാശാലയ്ക്ക് അവധി പ്രഖ്യാപിച്ചു. വിദ്യാര്ഥിനികളുടെ സ്വകാര്യ വീഡിയോ ഓണ്ലൈനില് പ്രചരിച്ചതിനെ തുടര്ന്നാണ് ശനിയാഴ്ച അര്ധരാത്രി മുതല് ഇവര് പ്രതിഷേധം ആരംഭിച്ചത്.
ഹോസ്റ്റലിലെ പെണ്കുട്ടികളുടെ ദൃശ്യങ്ങള് ഹോസ്റ്റലിലെ തന്നെ ഒരു പെണ്കുട്ടി പകര്ത്തി മറ്റൊരാള്ക്ക് അയച്ചുകൊടുക്കുകയായിരുന്നു. ഹിമാചല് പ്രദേശിലെ ഷിംലയിലുള്ള സുഹൃത്തിനാണ് വീഡിയോ അയച്ചുകൊടുത്തത്. ഇയാള് ഇത് ഇന്റര്നെറ്റിലൂടെ പ്രചരിപ്പിക്കുകയായിരുന്നു.
വീഡിയോ പുറത്തായതിനെ തുടര്ന്ന് ഒരു പെണ്കുട്ടി കുഴഞ്ഞുവീണിരുന്നു.എന്നാല് വീഡിയോ ചോര്ന്നതോടെ നിരവധി പെണ്കുട്ടികള് ജീവനൊടുക്കാന് ശ്രമിച്ചെന്ന വാര്ത്തകള് സര്വകലാശാലയും പോലീസും നിഷേധിച്ചു. അറസ്റ്റിലായ പെണ്കുട്ടിയുടെ ഫോണില് സ്വന്തം ദൃശ്യങ്ങള് മാത്രമേ കണ്ടെത്തിയിട്ടുള്ളെന്നും പോലീസ് അറിയിച്ചു.