ഉരുള്പൊട്ടലില് തകര്ന്നടിഞ്ഞ വയനാട്ടില് എത്തി നടനും ലെഫ്റ്റനന്റ് കേണലും കൂടിയായ മോഹന്ലാല്. സൈനിക യൂണിഫോമിലാണ് മോഹന്ലാല് എത്തിയത്. ദുരിത ബാധിതരെ സന്ദര്ശിച്ച ശേഷം മോഹന്ലാല് ദുരന്ത ഭൂമിയായ മുണ്ടക്കൈയിലേക്ക് തിരിച്ചു. ഇവിടെ വച്ച് മോഹന്ലാല് മാധ്യമ പ്രവര്ത്തകരെ കാണും.നേരത്തെ മുഖ്യമന്ത്രിയുടെ ദുരിതാശ്വാസ നിധിയിലേക്ക് 25 ലക്ഷം രൂപ താരം സംഭാവന ചെയ്തിരുന്നു.
മോഹന്ലാല് പങ്കുവെച്ച വൈകാരികമായ കുറിപ്പും ഏറെ ശ്രദ്ധ നേടിയിരുന്നു. ഈ ദുഷ്കരമായ സമയത്ത് നമ്മള് ഒറ്റക്കെട്ടായി നില്ക്കാനും നമ്മുടെ ഐക്യത്തിന്റെ ശക്തി കാണിക്കാനും താന് പ്രാര്ത്ഥിക്കുന്നു എന്നായിരുന്നു മോഹന്ലാല് ഫെയ്സ്ബുക്കില് കുറിച്ചത്.
”വയനാട് ദുരന്തബാധിതര്ക്ക് ആശ്വാസം പകരാന് നിസ്വാര്ത്ഥരായ സന്നദ്ധപ്രവര്ത്തകര്, പൊലീസുകാര്, ഫയര് ആന്ഡ് റെസ്ക്യൂ, എന്ഡിആര്എഫ്, സൈനികര്, സര്ക്കാര് ഉദ്യോഗസ്ഥര് തുടങ്ങി അക്ഷീണം പ്രയത്നിക്കുന്ന ഓരോ വ്യക്തിയുടെയും ധൈര്യത്തെ ഞാന് സല്യൂട്ട് ചെയ്യുന്നു.”
മുമ്പും നമ്മള് വെല്ലുവിളികളെ നേരിട്ടുണ്ട്. കൂടുതല് ശക്തരാകുകയും ചെയ്തിട്ടുണ്ട്. ദുഷ്കരമായ സമയത്ത് നമ്മള്ക്ക് എല്ലാവര്ക്കും ഒറ്റക്കെട്ടായി നില്ക്കാനും ഐക്യത്തിന്റെ ശക്തി കാണിക്കാനും താന് പ്രാര്ഥിക്കുകയും ചെയ്യുന്നു എന്നായിരുന്നു മോഹന്ലാല് കുറിച്ചത്.
