ഏഴാമത് അജ്മാന്‍ ലിവ ഈത്തപ്പഴ മേളക്ക് വെള്ളിയാഴ്ച തുടക്കമാകും. അജ്മാനിലെ വിനോദ സഞ്ചാര വികസന വകുപ്പ് നടത്തുന്ന മേള ഞായറാഴ്ച വരെ എമിറേറ്റ്സ് ഹോസ്പിറ്റാലിറ്റി സെന്‍ററില്‍ നടക്കും.
സുപ്രീം കൗണ്‍സില്‍ അംഗവും അജ്മാന്‍ ഭരണാധികാരിയുമായ ശൈഖ് ഹുമൈദ് ബിന്‍ റാഷിദ് അല്‍ നുഐമിയുടെ രക്ഷാകര്‍തൃത്വത്തിലാണ് ലിവ അജ്മാന്‍ ഡേറ്റ്സ് ആന്‍ഡ് ഹണി ഫെസ്റ്റിവല്‍ അരങ്ങേറുന്നത്. ഈ വര്‍ഷത്തെ പതിപ്പില്‍ 400ലധികം സ്റ്റാളുകള്‍ ഉണ്ടാകുമെന്നാണ് പ്രതീക്ഷ.
ഉത്സവാന്തരീക്ഷത്തില്‍ മൂന്ന് ദിവസം നീളുന്ന മേളയില്‍ പഴയ ഇമാറാത്തി ആചാരങ്ങളും പാരമ്ബര്യങ്ങളും പുനരുജ്ജീവിപ്പിക്കാന്‍ ലക്ഷ്യമിട്ടുള്ള പരിപാടികള്‍ അരങ്ങേറും. കര്‍ഷകര്‍ യു.എ.ഇയില്‍ ഉല്‍പാദിപ്പിക്കുന്ന മികച്ച ഈത്തപ്പഴങ്ങളാണ് മേളയില്‍ പ്രദര്‍ശിപ്പിക്കുന്നത്. ഈത്തപ്പഴത്തിനുപുറമെ തേന്‍, സിട്രസ് പഴങ്ങള്‍, നാരങ്ങ, മാമ്ബഴം, ബദാം എന്നിവ മേളയില്‍ പ്രദര്‍ശനത്തിന് എത്തും.
