ഭോപാല്: മഹാരാഷ്ട്രയില് നിന്ന് സൈക്കിളില് ഉത്തര്പ്രദേശിലെ വീട്ടിലേക്കുള്ള യാത്രക്കിടെ കുടിയേറ്റ തൊഴിലാളി മരിച്ചു. മധ്യപ്രദേശില് വെച്ചായിരുന്നു മരണം. മഹാരാഷ്ട്രയിലെ ഭിവാണ്ടിയില് നിന്ന് രണ്ടു ദിവസം മുമ്ബാണ് തബാറക് അന്സാരി 10 തൊഴിലാളികള്ക്കൊപ്പം യാത്ര പുറപ്പെട്ടത്. ഭിവാണ്ടിയിലെ യന്ത്രത്തറി നിര്മാണശാലയിെല തൊഴില് നഷ്ടമായതിനാല് അവര്ക്ക് വീട്ടിലേക്ക് പോവുകയല്ലാതെ മറ്റ് മാര്ഗങ്ങളുണ്ടായിരുന്നില്ല.
കൈയില് പണമില്ലാതെ, ഭക്ഷണത്തിനു പോലും ബുദ്ധിമുട്ടിയപ്പോഴാണ് ഈ സാഹസത്തിനൊരുങ്ങിയത്. സൈക്കിളില് 350 കി.മി യാത്ര പൂര്ത്തിയാക്കിയിരുന്നു. പെട്ടെന്ന് തബാറക് ക്ഷീണം തോന്നുന്നുവെന്ന് പറഞ്ഞ് റോഡിലേക്ക് കുഴഞ്ഞുവീഴുകയായിരുന്നു.-സംഘത്തിലെ തൊഴിലാളികളിലൊരാളായ രമേഷ് കുമാര് ഗോണ്ട് പറഞ്ഞു.
നിര്ജലീകരണവും അമിതമായ ക്ഷീണവും സൂര്യാഘാതവുമാകാം മരണകാരണമെന്ന് പൊലീസ് അറിയിച്ചു.