ശബരിമല സ്ത്രീ പ്രവേശനം സംബന്ധിച്ച കേസില് നിലപാട് വ്യക്തമാക്കി സുപ്രിംകോടതി. ശബരിമലയിലെ ഭരണപരമായ കാര്യങ്ങളില് ഇടപെടാനാകില്ലെന്നും സ്ത്രീപ്രവേശന വിഷയത്തില് നിയമപരമായ കാര്യങ്ങള് മാത്രമാവും കോടതി പരിശോധിക്കുകയെന്നും ഭരണഘടനാ ബെഞ്ച് വ്യക്തമാക്കി.
ശബരിമലയില് പത്തിനും അന്പതിനും ഇടയില് പ്രായമുള്ള സ്ത്രീകള്ക്ക് പ്രവേശനം അനുവദിക്കണമെന്ന ഹരജി പരിഗണിക്കവേയാണ് സുപ്രിംകോടതി ഇക്കാര്യങ്ങള് വ്യക്തമാക്കിയത്.
അതേസമയം ശബരിമല ക്ഷേത്രത്തിലെ ആചാരങ്ങള് ബുദ്ധവിശ്വസത്തിന്റെ തുടര്ച്ചയാണെന്നും നികുതിദായകരുടെ പണമാണ് ശബരിമലയിലേക്ക് എത്തുന്നതെന്നും ഹരജിക്കാര് ചൂണ്ടിക്കാട്ടി. എന്നാല്വസ്തുതകളുടെ അടിസ്ഥാനത്തില് ആ വാദം സ്ഥാപിക്കണമെന്ന് കോടതി മറുപടി നല്കി.
ചീഫ് ജസ്റ്റിസ് ദീപക് മിശ്ര, ജസ്റ്റിസുമാരായ ആര്.എഫ് നരിമാന്, ഇന്ദു മല്ഹോത്ര, എ.എം ഖാന്വില്ക്കര്, ഡി.വൈ ചന്ദ്രചൂഡ് എന്നിവര് അടങ്ങിയ ഭരണഘടനാ ബെഞ്ചാണ് ഹരജിയില് വാദം കേള്ക്കുന്നത്.
