തിരുവനന്തപുരം: ലോക കേരള സഭയ്ക്കുവേണ്ടി സര്‍ക്കാര്‍ പണം ധൂര്‍ത്തടിക്കുന്നില്ലെന്ന് സ്പീക്കര്‍ പി.ശ്രീരാമകൃഷ്ണന്‍. തെറ്റിധാരണ മൂലമാണ് ചിലര്‍ ഇത്തരം വാര്‍ത്ത പ്രചരിപ്പിക്കുന്നതെന്നും സ്പീക്കര്‍. വിദേശത്തു നടത്തുന്ന ധൂര്‍ത്തിന്‍റെ ഭാഗമാകാനില്ലെന്ന് പ്രതിപക്ഷ നേതാവ് രമേശ് ചെന്നിത്തല നിലപാട് എടുത്തതോടെയാണ് സ്പീക്കറുടെ വിശദീകരണം.
ദുബായിയില്‍ നടക്കുന്നത് ലോക കേരളസഭയുടെ മിഡില്‍ ഈസ്റ്റ് സമ്മേളനമാണ്. മുഖ്യമന്ത്രി, പ്രതിപക്ഷ, സ്പീക്കര്‍ എന്നിവരുടെ ചെലവുകള്‍ മാത്രമാണ് സര്‍ക്കാര്‍ വഹിക്കുന്നതെന്നും സ്പീക്കര്‍ പറഞ്ഞു. ഫെബ്രുവരി 15,16 തീയതികളില്‍ ദുബായിയില്‍ മിലേനിയം ഹോട്ടലിലും എത്തിസലാത്ത് അക്കാഡമി ഹാളിലുമാണ് സമ്മേളനം നടക്കുന്നത്.
സ്‌പോണ്‍സര്‍മാരുടെ സഹായത്തോടെയാണ് സമ്മേളനവും കലാപരിപാടികളും നടത്തുന്നതെന്ന് നോര്‍ക്ക റൂട്ട്‌സ് റസിഡന്‍റ് വൈസ് ചെയര്‍മാന്‍ കെ. വരദരാജന്‍ വ്യക്തമാക്കിയിരുന്നു. കഴിഞ്ഞ ലോക കേരള സഭയുടെ പ്രഥമ സമ്മേളനം നടത്താന്‍ 4.5 കോടി രൂപയായിരുന്നു സര്‍ക്കാര്‍ വകയിരുത്തിയത്.
