ലക്നോ: ഉത്തര്‍പ്രദേശില്‍ യുവാവിനെ പട്ടാപ്പകല്‍ നടുറോഡില്‍ അടിച്ചുകൊല്ലാന്‍ ശ്രമിച്ച രണ്ട് പോലീസുകാര്‍ക്ക് സസ്പെന്‍‌ഷന്‍. നേപ്പാള്‍ അതിര്‍ത്തിയായ കിഴക്കന്‍ യുപിയിലെ സിദ്ധാര്‍‌ഥ് നഗറിലായിരുന്നു സംഭവം. ഗതാഗതനിയമം തെറ്റിച്ചെന്നാരോപിച്ചായിരുന്നു യുവാവിനെ പോലീസുകാര്‍ മര്‍ദിച്ചത്. ഇയാള്‍ മദ്യപിച്ചിരുന്നതായും പ്രദേശത്ത് വര്‍ഗീയ സംഘര്‍ഷത്തിനു ശ്രമിച്ചെന്നുമാണ് പോലീസ് പറയുന്നത്.
എന്നാല്‍ യുവാവിനെ വൈദ്യപരിശോധനയ്ക്കു പോലീസ് വിധേയനാക്കിയിരുന്നില്ല. യുവാവിനൊപ്പമുണ്ടായിരുന്ന ആള്‍ പോലീസ് മര്‍ദനത്തിന്‍റെ ദൃശ്യങ്ങള്‍ പകര്‍ത്തി പുറത്തുവിട്ടതോടെയാണ് സംഭവം വിവാദമായത്. റിങ്കു പാണ്ഡെ എന്ന യുവാവിനെയാണ് പോലീസ് ക്രൂരമായി മര്‍ദ്ദിച്ചത്. ബൈക്കില്‍ വന്ന റിങ്കുവിനെ വാഹന പരിശോധനയ്ക്കായാണ് പോലീസുകാര്‍ തടഞ്ഞത്. റിങ്കുവിനൊപ്പം കുട്ടിയുമുണ്ടായിരുന്നു. വാഹനത്തിന്‍റെ രേഖകള്‍ പരിശോധിക്കുന്നതിനിടെ തര്‍‌ക്കം ഉന്നയിച്ച റിങ്കുവിനെ ബൈക്കില്‍നിന്ന് പോലീസുകാര്‍ വലിച്ചുതാഴെയിട്ടു. നിലത്തുവീണ റിങ്കുവിന്‍റെ പുറത്ത് കയറിയിരുന്നാണ് ഒരു പോലീസുകാരന്‍ മര്‍ദിച്ചത്.
ബഹളത്തിനിടെ റിങ്കുവിന്‍റെ ഒപ്പമുണ്ടായിരുന്ന പെണ്‍കുട്ടിക്ക് പരിക്കേല്‍ക്കുകയും ചെയ്തു. സബ് ഇന്‍സ്‌പെക്ടര്‍ വീരേന്ദ്ര മിശ്രയും ഹെഡ് കോണ്‍സ്റ്റബിള്‍ മഹേന്ദ്ര പ്രസാദും ചേര്‍ന്നാണ് റിങ്കു പാണ്ഡെയെ മര്‍ദ്ദിച്ചത്. ബൈക്കിന്‍റെ താക്കോല്‍ പോലീസുകാര്‍ ആവശ്യപ്പെട്ടെങ്കിലും കൊടുക്കാന്‍ റിങ്കു തയാറായില്ല. ഇത് പിടിച്ചുപറിക്കാന്‍ പോലീസുകാര്‍ ശ്രമിക്കുന്നതും വീഡിയോയില്‍ കാണാം.
