എല്ലാവര്ഷവും ഒരു കോടി തൊഴില് നല്കുന്നതായി മോദി സര്ക്കാര് പറയുമ്ബോള് രാജ്യത്ത് ദിനംപ്രതി തൊഴില്ലാത്തവരുടെ എണ്ണം വര്ധിക്കുകയാണെന്ന് ശിവ സേന. തെരഞ്ഞെടുപ്പ് വാഗ്ദാനം പാലിച്ച് എല്ലാവര്ഷവും ഒരു കോടി തൊഴില് സൃഷ്ടിക്കുന്നതായാണ് മോദി സര്ക്കാര് അവകാശപ്പെടുന്നത്. എന്നാല് തൊഴിലില്ലാത്തവരുടെ എണ്ണം വര്ധിച്ചുവരികയാണെന്നും ശിവ സേനയുടെ മുഖപത്രമായ സാമ്ന പറയുന്നു.
തൊഴില് എവിടെയെന്ന് കേന്ദ്രത്തോടുള്ള കോണ്ഗ്രസ് അധ്യക്ഷന് രാഹുല് ഗാന്ധിയുടെ ചോദ്യത്തിനും സാമ്ന പരോക്ഷ മറുപടി പറഞ്ഞു. പ്രതിപക്ഷപാര്ട്ടികളുടെ ഭരണകാലത്തും തൊഴിലില്ലായ്മ രൂക്ഷമായിരുന്നെന്ന കാര്യം അവര് മറക്കരുതെന്നും സാമ്നയിലെ മുഖപ്രസംഗം ഓര്മിപ്പിച്ചു. ആയുഷ്മാന് ഭാരത് പദ്ധതിയിലൂടെ ഒരു ലക്ഷം തൊഴില് സൃഷ്ടിച്ചെന്നാണ് വാര്ത്ത. എന്നാല് മറ്റൊരു വാര്ത്ത പറയുന്നു 24 ലക്ഷം സര്ക്കാര് തസ്തികകള് ഒഴിഞ്ഞു കിടക്കുകയാണെന്നും മൂന്നു കോടി യുവാക്കള് തൊഴില് രഹിതരാണെന്നും. ഈ രണ്ട് റിപ്പോര്ട്ടുകളും രാജ്യത്തെ തൊഴിലില്ലായ്മയുടെ നഗ്ന യാഥാര്ഥ്യം തുറന്നുകാട്ടുന്നതായും സാമ്ന പറയുന്നു.
റിപ്പോര്ട്ടുകളില് പുതുതായി ഒന്നുമില്ല. വര്ഷം ഒരു കോടി തൊഴില്നല്കുമെന്ന് വാഗ്ദാനം ചെയ്തവരുടെ ഭരണകാലത്തില് ഒന്നിനും മാറ്റം വന്നിട്ടില്ലെന്നും സാമ്ന മുഖപ്രസംഗത്തില് വിമര്ശിച്ചു.