മുംബൈ: മുംബൈയിൽ ഭാട്ടിയ ആശുപത്രിക്ക് സമീപം ബഹുനില കെട്ടിടത്തിലുണ്ടായ തീപിടിത്തത്തിൽ രണ്ട് പേർ മരിച്ചു. 15 പേർക്ക് പരിക്കേൽക്കുകയും ചെയ്തു. പരിക്കേറ്റവരെ ഭാട്ടിയ ആശുപത്രിയിൽ പ്രവേശിപ്പിച്ചു. ഇവരിൽ മൂന്നുപേരുടെ നില ഗുരുതരമാണ്.
മുംബൈയിലെ ടർഡിയോ ഏരിയയിലെ ഗോവാലിയ ടാങ്കിൽ ഗാന്ധി ആശുപത്രിക്ക് എതിർവശത്തുള്ള ബഹുനിലകെട്ടിടമായ കമലയിലാണ് തീപിടിത്തം ഉണ്ടായത്. ശനിയാഴ്ച രാവിലെ ഏഴോടെയായിരുന്നു സംഭവം.
കെട്ടിടത്തിൽനിന്ന് മുഴുവൻ ആളുകളെയും പുറത്തെത്തിച്ചതായി മുംബൈ മേയർ കിഷോരി പഡ്നേക്കർ പറഞ്ഞു. തീ നിയന്ത്രണ വിധേയമാക്കാൻ കഴിഞ്ഞിട്ടുണ്ടെന്നും അദ്ദേഹം അറിയിച്ചു. 13 ഫയർ എൻജിനുകളാണ് സ്ഥലത്തെത്തി തീയണച്ചത്.