ലക്നോ: ബിഎസ്പി അധ്യക്ഷ മായാവതിക്കെതിരായ അധിക്ഷേപ പരാമര്ശത്തില് ഖേദം പ്രകടിപ്പിച്ച് ബിജെപി എംഎല്എ. ആരെയും അപമാനിക്കാന് ഉദ്ദേശിച്ചായിരുന്നില്ല തന്റെ വാക്കുകളെന്ന് ഉത്തര്പ്രദേശില്നിന്നുള്ള സാധനാ സിംഗ് പറഞ്ഞു. അധിക്ഷേപ പരാമര്ശത്തില് സാധന സിംഗിനെതിരെ ദേശീയ വനിതാ കമ്മീഷന് കേസെടുത്തിരുന്നു. ഇതിനു പിന്നാലെയാണ് നേതാവ് മാപ്പുപറഞ്ഞു തലയൂരിയത്.
മായാവതി സ്ത്രീത്വത്തിനു കളങ്കമാണെന്നും അധികാരത്തിനുവേണ്ടി അവര് അവരുടെ അന്തസ് വില്ക്കുകയാണെന്നുമായിരുന്നു മുഗള്സാരായിയില്നിന്നുള്ള ബിജെപി എംഎല്എ സാധനാ സിംഗിന്റെ വിമര്ശനം. അവര്ക്ക് ആത്മാഭിമാനമില്ല. അവര് മാനഭംഗത്തിന് ഏതാണ്ട് അരികെ എത്തിയിരുന്നു. മാനഭംഗത്തിനിരയായപ്പോള് ദ്രൗപതി പ്രതികാരത്തിന് പ്രതിജ്ഞ ചെയ്തതായി ചരിത്രത്തില് കാണാന് കഴിയും. ഈ സ്ത്രീക്ക് എല്ലാം നഷ്ടപ്പെട്ടു. എന്നിട്ടും ഇവര് അധികാരത്തിനു വേണ്ടി അന്തസ് വില്ക്കുകയാണ്. ഞാന് അവരെ ശക്തമായി അപലപിക്കുന്നു. അവര് സ്ത്രീത്വത്തിനുതന്നെ അപമാനമാണ്. അധികാരത്തിനും സുഖത്തിനുംവണ്ടി അവര് അധിക്ഷേപങ്ങള് വിഴുങ്ങുന്നു. അവര് സ്ത്രീത്വത്തിനു കളങ്കമാണ്- സാധനാ സിംഗ് ശനിയാഴ്ച ഒരു റാലിയില് പ്രസംഗിക്കവെ പറഞ്ഞു.
