ജക്കാര്‍ത്ത: ഇന്തോനീഷ്യയിലെ ബാലിയിലേക്ക് ഇനി ഈ വര്‍ഷം വിദേശ വിനോദ സഞ്ചാരികളെ പ്രവേശിപ്പിക്കില്ലെന്ന് അധികൃതര്‍ അറിയിച്ചു. അടുത്ത മാസം മുതല്‍ ഇവിടേക്ക് വിദേശ സഞ്ചാരികള്‍ക്ക് പ്രവേശനം അനുവദിക്കും എന്നായിരുന്നു നേരത്തെ അറിയിച്ചിരുന്നത്. എന്നാല്‍, രാജ്യത്ത് കോവിഡ് രോഗികളുടെ എണ്ണം കൂടുന്നത് കണക്കിലെടുത്ത് ആ തീരുമാനം മാറ്റുകയായിരുന്നു.
രാജ്യത്തെ കോവിഡ് ബാധിതരുടെ എണ്ണത്തില്‍ ഗണ്യമായ കുറവ് ഉണ്ടാവുകയും പിന്നീട് അത് പഴയപടി തന്നെ ആവുകയും ചെയ്യുകയായിരുന്നു. ജൂലൈ അവസാനം വരെ ഇവിടുത്തെ വിനോദ സഞ്ചാര കേന്ദ്രങ്ങളും ആരാധനാലയങ്ങളും അടഞ്ഞുകിടക്കുകയായിരുന്നു. അതിനു ശേഷം ഇവിടങ്ങളിലേക്ക് സ്വദേശികള്‍ക്ക് മാത്രം പ്രവേശനം അനുവദിച്ചിരുന്നു.
പിന്നാലെ, വിദേശികള്‍ക്ക് കൂടി പ്രവേശനം നല്‍കാന്‍ തീരുമാനിക്കുകയായിരുന്നു. എന്നാല്‍ കഴിഞ്ഞ ദിവസങ്ങളില്‍ ഇവിടെ കോവിഡ് ബാധിതരുടെ എണ്ണത്തില്‍ വര്‍ധനവ് രേഖപ്പെടുത്തി. ഇതോടെ തീരുമാനം ഭരണകൂടം പുനഃപരിശോധിക്കുകയായിരുന്നു.
