കോഴിക്കോട് വിദ്യാര്ത്ഥി ഷോക്കേറ്റ് മരിച്ചു. കുറ്റിക്കാട്ടൂര് പുതിയോട്ടില് ആലി മുസ്ലിയാരുടെ മകന് മുഹമ്മദ് റിജാസ് (19) ആണ് മരിച്ചത്. കടയുടെ തൂണില് നിന്നും ഷോക്കേറ്റാണ് മരണം.
മഴയെ തുടര്ന്ന് സ്കൂട്ടര് നിര്ത്തി കട വരാന്തയില് കയറി നിന്നപ്പോഴാണ് കടയുടെ തൂണില് നിന്നും ഷോക്കേറ്റത്. ഇന്നലെ അര്ദ്ധരാത്രിയായിരുന്നു അപകടം. സംഭവത്തില് കെഎസ്ഇബിക്കെതിരെ ആരോപണവുമായി കടയുടമ രംഗത്തെത്തി. കെഎസ്ഇബിയുടെ അനാസ്ഥയാണ് 19കാരന്റെ മരണത്തിന് കാരണമെന്ന് കടയുടമ പി.മുഹമ്മദ് പറഞ്ഞു.
കടയിലെ തൂണിൽ ഷോക്ക് ഉണ്ടെന്ന് കെഎസ്ഇബിയിൽ പരാതിപ്പെട്ടിരുന്നു. ഒരു ജീവനക്കാരൻ ഇന്നലെ രാവിലെ വന്ന് പരിശോധിച്ചു. പക്ഷേ പ്രശ്നം പരിഹരിക്കുന്നതിന് നടപടി സ്വീകരിച്ചില്ല. യുവാവ് മരിച്ചതിന് ശേഷമാണ് വൈദ്യുതി വിച്ഛേദിച്ചതെന്നും കടയുടമ പറഞ്ഞു.
