വാഷിങ്ടണ്‍: സാമൂഹിക മാധ്യമമായ ഫേസ്ബുക്ക് ഡിലീറ്റ് ചെയ്യാന്‍ സമയമായെന്ന് വാട്സ് ആപ് സഹസ്ഥാപകന്‍ ബ്രിയാന്‍ ആക്ടണ്‍. ട്വിറ്ററിലുടെയാണ് ബ്രിയാന്‍ ഫേസ്ബുക്കിനെ വിമര്‍ശിച്ച്‌ രംഗത്തെത്തിയത്. ഫേസ്ബുക്ക് 50 മില്യണ്‍ ഉപയോക്താക്കളുടെ വിവരങ്ങള്‍ ചോര്‍ത്തിയെന്ന വാര്‍ത്ത പുറത്ത് വന്നതിന് പിന്നാലെയാണ് ആക്ടന്റെ പ്രതികരണം.
ഡിലീറ്റ് ഫോര്‍ ഫേസ്ബുക്ക് എന്ന ഹാഷ് ടാഗോട് കൂടിയാണ് ആക്ടണ്‍ ട്വിറ്ററിലില്‍ പോസ്റ്റിട്ടിരിക്കുന്നത്. വിവരങ്ങള്‍ ചോര്‍ന്നതിന്റെ പശ്ചാത്തലത്തില്‍ നിരവധി പേരാണ് ഹാഷ് ടാഗിന് പിന്തുണയുമായി എത്തുന്നത്.
രണ്ടായിരത്തി പതിനാറിലെ അമേരിക്കന്‍ തിരഞ്ഞെടുപ്പിന്റെ ഫലത്തെ റഷ്യ സ്വാധീനിച്ചു എന്നും അതിന് ബ്രിട്ടനിലെ സ്വകാര്യ കമ്പനികള്‍ അതിന് കൂട്ട് നിന്നു എന്നും ഫേസ്ബുക്ക് അതിനുള്ള അവസരം ഒരുക്കി എന്നുമൊക്കെയുള്ള വാര്‍ത്തകളാണ് കഴിഞ്ഞ ദിവസം പുറത്ത് വന്നത്. ഇതിനെ പിന്നാലെ അമേരിക്കന്‍ ഒാഹരി വിപണിയില്‍ ഫേസ്ബുക്കിന്റെ ഒാഹരി വില ഇടിഞ്ഞിരുന്നു
