നിരോധിച്ച നോട്ടിന് പകരം 1000 രൂപയുടെ പുതിയ നോട്ടുകള്‍ ഉടന്‍ രാജ്യത്ത് കൊണ്ടുവരില്ലെന്ന് കേന്ദ്ര ധനമന്ത്രി അരുണ്‍ ജെയ്റ്റ്‌ലി. ദുരുപയോഗം തടയുന്നതിനാണ് അസാധുവായ നോട്ടുകള്‍ മാറിയെടുക്കുന്നതിനുള്ള തുകയുടെ പരിധി 2000 ആക്കി കുറച്ചതെന്നും അദ്ദേഹം വ്യക്തമാക്കി. രാജ്യസഭയിലാണ് ജെയ്റ്റ്‌ലി ഇക്കാര്യം പറഞ്ഞത്. രാജ്യത്തെ 22, 500 എടിഎമ്മുകള്‍ ഇന്ന് പുന:ക്രമീകരിക്കുമെന്നും ഇതോടെ പുതിയ നോട്ടുകള്‍ കൂടുതല്‍ എടിഎമ്മുകള്‍ വഴി ലഭ്യമാകുമെന്നും മന്ത്രി സഭയെ അറിയിച്ചു. നോട്ട് നിരോധനത്തെ തുടര്‍ന്ന് രാജ്യത്തെ ജനങ്ങള്‍ നേരിടുന്ന ദുരിതങ്ങള്‍ക്ക് പരിഹാരം കാണാന്‍ സര്‍ക്കാര്‍ എന്തൊക്കെ നടപടികള്‍ കൈക്കൊണ്ടെന്ന് വിശദമാക്കണമെന്ന് പ്രതിപക്ഷം ആവശ്യപ്പെട്ടിരുന്നു. ഇതിനെ തുടര്‍ന്നാണ് മന്ത്രി ഇക്കാര്യം വ്യക്തമാക്കിയത്.
